17 mart 2026-cı il tarixində Üzeyir Hacıbəyli adına Bakı Musiqi Akademiyasının “Musiqi tarixi” kafedrasının müəllimi, sənətşünaslıq üzrə fəlsəfə doktoru, dosent Minaxanım Babayevanın açıq dərsi keçirilmişdir.

Babayeva “XIX əsrin musiqisində romantizm cərəyanı” mövzusunda mühazirə oxuyaraq romantizm dövründə baş verən ictimai-mədəni prosesləri, həmin dövrün ümumi bədii mənzərəsini və romantizmin yaranma səbəblərini ətraflı şəkildə şərh etmişdir. O, həmçinin XIX əsrdə diqqət mərkəzində olan yeni mövzuları, həmin mövzuların məntiqi nəticəsi kimi təşəkkül tapan yeni janr və formaları ardıcıl və aydın şəkildə izah etmişdir. Mühazirə ayrı-ayrı müddəaları əyani şəkildə təqdim edən musiqi illüstrasiyaları ilə müşayiət olunmuşdur.

Açıq dərsdə Akademiyanın professor-müəllim heyəti geniş tərkibdə iştirak etmişdir. Tədbirdə Əməkdar incəsənət xadimi, “Musiqi tarixi” kafedrasının müdiri, professor Zümrüd Dadaşzadə, Əməkdar müəllim, sənətşünaslıq üzrə fəlsəfə doktoru, “Musiqi nəzəriyyəsi” kafedrasının müdiri, professor Könül Nəsirova, Metodiki şuranın üzvü, professor Lalə Cəfərova, sənətşünaslıq üzrə fəlsəfə doktoru, dosent Xatirə Həsənzadə, elmlər doktoru, dosent Kəmalə Ələsgərli, elmlər doktoru, dosent İnna Pazıçeva, “Şifahi ənənəli Azərbaycan professional musiqisi və onun istiqamətlərinin tədqiqi: orqanologiya və akustika” elmi-tədqiqat laboratoriyasının böyük elmi işçisi, sənətşünaslıq üzrə fəlsəfə doktoru Aynur Əliyeva, “Musiqi tarixi” kafedrasının müəllimi Ülkər Rzayeva və laborant Səmra Qaziyeva iştirak etmişlər.

Açıq dərsi izləyən professor-müəllim heyəti dərsin yüksək elmi-metodiki səviyyədə təşkil olunduğunu xüsusi vurğulamış, tədris prosesində tətbiq edilən müasir yanaşmaların tələbələrin peşəkar hazırlığının artırılmasına mühüm töhfə verdiyini qeyd etmişdir.

Üzeyir Hacıbəyli adına Bakı Musiqi Akademiyası musiqi təhsili sahəsində innovativ metodların tətbiqi, elmi-pedaqoji mühitin davamlı inkişafı və yüksək ixtisaslı kadrların hazırlanması istiqamətində həyata keçirdiyi məqsədyönlü fəaliyyətlə ölkənin aparıcı ali musiqi təhsil müəssisələrindən biri kimi öz mövqeyini qoruyub saxlayır.