Asəf Zeynallı adına Musiqi Kollecində Ustad Dərsləri keçirildi

2 aprel tarixində Asəf Zeynallı adına Musiqi Kollecində Azərbaycan Respublikasının Əməkdar artisti, bəstəkar-aranjemançı, Bakı Musiqi Akademiyasının Bəstəkarlıq kafedrasının dosenti və müəllimi Vüqar Camalzadə, eləcə də bəstəkar-aranjemançı, Bəstəkarlıq kafedrasının müəllimi Azər Hacıəsgərlinin ustad dərsləri keçirilmişdir.

Tədbir çərçivəsində tələbələrə aranjemançılığın sirləri, müasir texnoloji alətlərin tətbiqi və onlardan istifadə qaydaları haqqında ətraflı məlumat verilmiş, eyni zamanda bəstəkarlıq sahəsində müxtəlif peşəkar yanaşmalar izah olunmuşdur. Dərs zamanı tələbələr musiqi sahəsində innovativ texnologiyaların əhəmiyyətini dərk edərək, praktik biliklərini təkmilləşdirmək imkanı əldə etmişlər.

Bundan əlavə, bu cür ustad dərslərinin mütəmadi keçirilməsi və gələcəkdə fakültə fənni kimi tədris edilməsi də nəzərdə tutulur. Tədbirin sonunda Asəf Zeynallı adına Musiqi Kollecinin yetirməsi  Pərviz Pianist  Niyazinin "Arzu" romansını, Vüqar Camalzadə ilə birgə  Rəşid Behbudov adına Dövlət Mahnı Teatrının solisti  Kazım Nicat isə (vokal) Emin Sabitoğlunun "Şükriyyə" mahnısını özünəməxsus interpretasiyada ifa etmişlər.

Ustad dərsləri tələbələr tərəfindən böyük maraqla qarşılanmış və onların yaradıcılıq inkişafına mühüm töhfə vermişdir.