25 aprel 2024-cü il tarixində Üzeyir Hacıbəyli adına Bakı Musiqi Akademiyasında “Metodika və xüsusi pedaqoji hazırlıq” kafedrasının tələbələrinin “Musiqi müəllimliyi” ixtisasının tələbələri ilə açıq dərsi keçirildi. 

Açıq dərsdə  “Metodika və xüsusi pedaqoji hazırlıq” kafedrasının dosentləri Həqiqət Yusifova, Nərgiz Əlizadə, baş müəllimlər Arzu İsmayılova, Nairə Qulamovanın tələbələri çıxış etdilər.

Dərs prosesində Q.Qarayevin “Yeddi gözəl baletindən “Vals”, Paxulskinin “Arzular”, Ə.Mustafazadə “Dreaming”, V.Mustafazadənin “Mart”, A.Məlikovun Prelüdiya N.2, F.Əmirovun Ekspromt N.2, “Xatirə”, Masazın Etüd N.6 əsərlərinin ifaçılıq xüsusiyyətləri təhlil olundu.

İl boyu tələbələrin pedaqoji təcrübəsinin formalaşması və təkmilləşməsi prosesində dəyərli fikirlərini əsirgəməyən, düzgün istiqamətə yönləndirən BMA-nın “Metodika və xüsusi pedaqoji hazırlıq” kafedrasının müdiri professor Elnarə Məmmədova və kafedranın digər müəllim heyəti iştirak etdilər.

Açıq dərslərin keçirilməsi pedaqoji təcrübə tədrisində olduqca vacib amillərdəndir. Məhz bu məqamlar gələcək müəllimlərin bilik və bacarıqlarının qiymətləndirilməsinə imkan yaradır.