26 iyun tarixində Azərbaycan Xalqları ilə Həmrəylik İctimai Birliyinin “Sodrujestvo” binasında “Klassika Zamanı” adlı yeni mədəni-maarifləndirici və təhsil layihəsinin açılışı baş tutdu.  

Tədbir Üzeyir Hacıbəyli adına Bakı Musiqi Akademiyası tərəfindən təşkil olunmuşdur.  

Layihənin əsas məqsədi – dünya və milli klassik musiqi irsini Azərbaycanın müasir gəncləri arasında təbliğ və populyarlaşdırmaqdır. Bu təşəbbüs birbaşa gənclərin özləri tərəfindən həyata keçirilir. Gənc musiqişünasların görkəmli bəstəkarların həyatından maraqlı bioqrafik faktlar, onların yaradıcılığının özünəməxsusluğu haqqında təqdimatları, eləcə də gənc musiqiçilərin bu dahi sənətkarların əsərlərini səsləndirməsi akademik musiqini gənc nəslə daha yaxın və anlaşıqlı etməyə xidmət edir.  

Layihənin ilk tədbiri 2025-ci ildə yubileyləri qeyd olunan bəstəkarların – İohann Sebastyan Bax, Domeniko Skarlatti, İohann Ştraus, Pyotr Çaykovski, Moris Ravel və Polad Bülbüloğlunun – yaradıcılığına həsr olunmuşdur.  

Bu bəstəkarların yaradıcılığı barədə məruzələr və onların musiqisi BMA-nın tələbələrinin Pakizə Mustafazadə, Əminəxanım Məmmədova, Ayşən Rəfizadə, Ayana Nəsirzadə, Aydan Nağıyeva, Dürnisə Hüseynova, Rəhimə Həmidova, eləcə də BMA-nın məzunu Ləman Qulamovanın ifasında səsləndirildi.  

Layihənin bədii rəhbəri – sənətşünaslıq üzrə fəlsəfə doktoru, BMA-nın baş müəllimi Alyona İnyakinadır.