3 iyul tarixində tanınmış Azərbaycan musiqiçisi, alim, Əməkdar incəsənət xadimi, orqan ifaçısı, sənətşünaslıq doktoru, professor, pedaqoq Tahirə Yaqubovanın doğum günüdür. 

Azərbaycan Bəstəkarlar İttifaqının üzvü, Azərbaycan Respublikası Prezidentinin fərdi təqaüdünə layiq görülmüş  incə, zərif, mehriban, eyni zamanda sərt, güclü, ilhamverici, qətiyyətli xanım, əla təşkilatçı və rəhbər  Yaqubova Tahirə Əhəd qızı nəzəriyyəçi və orqan ifaçısıdır.  İlkin musiqi təhsilini Bülbül adına Orta ixtisas musiqi məktəbində fortepiano sinfində (müəllimlər R.İ.Siroviçdən və  N.N.Yegizarovadan (8-ci sinifdən) almışdır.  1961-ci ildə məktəbi bitirdikdən sonra Azərbaycan Dövlət Konservatoriyasının Musiqişünaslıq fakültəsinə daxil olmuş, 1966-cı ildə həmin müəssisəni  bitirmişdir. V kursda oxuyarkən Azərbaycanın Əməkdar İncəsənət Xadimi, professor Z.Q.Cəfərovanın yanında orqan alətində ifa etməyə başlamışdır. “Musiqişünaslıq” (1966) və “Orqan” (1970) ixtisasları üzrə iki diploma malikdir.  Memarlıq və İncəsənət İnstitutunun aspirantı kimi 1974-cü ildə uğurla müdafiə etdiyi “Müasir Azərbaycan musiqisində tematizm problemi və onun inkişaf prinsipləri” adlı dissertasiya yazır və alimlik dərəcəsinə namizəd olaraq layiq görülür. 

Azərbaycan Dövlət Konservatoriyasında 1970-ci ildən iki ixtisas - “Musiqi nəzəriyyəsi” və “Orqan” üzrə çalışır (indiki Üzeyir Hacıbəyli adına Bakı Musiqi Akademiyası). O, müxtəlif nəzəri fənlərdən: Harmoniya, Solfecio, Təhlil, Polifonik analiz, Harmoniya tarixi, Müasir Harmoniya (2005-ci ilə qədər) ilə yanaşı orqan üzrə praktiki və mühazirə dərsləri demişdir.  1991-ci ildən orqan sinfinin, 1995-ci ildən isə “Orqan və klavesin” kafedrasının müdiridir.  O, “Musiqişünaslıq” (1975, Moskva) və “Orqan” (1988, Veymar, Almaniya) ixtisasları üzrə təcrübə keçmiş, burada bir neçə ay ərzində professor K.R.Byüme ilə birlikdə ifaçılıq sənətini təkmilləşdirmişdir.  Bundan əlavə, müxtəlif dövrlərdə Almaniya, İsveç, Hollandiya və s. ölkələrin  görkəmli orqan ifaçılarının iştirakı ilə orqan ifaçılığı kurslarında iştirak etmişdir.  İki beynəlxalq sertifikatı var.  

Kafedranın açılması ilə T.Yaqubova tədrisə uyğun olaraq orqan ifaçılığının tarixi, metodikası, registr üslubu üzrə mühazirələr, həmçinin praktiki məşğələlər - “ansambl”, “pedal texnikası”, “pedaqoji təcrübə” təqdim edir.  Onun məzunları orqan müsabiqəsinin laureatları, Azərbaycan orqan  məktəbini beynəlxalq səviyyədə uğurla təmsil edən musiqiçilərdir.  O, Azərbaycanda orqan sənətinin səviyyəsini yüksəltmək üçün Mədəniyyət Nazirliyi ilə birlikdə Ü.Hacıbəyli adına  BMA-nın nəzdində fəaliyyət göstərən Orta ixtisas musiqi Məktəb-studiyasında, Bülbül və G.Şaroyev adına Musiqi məktəblərində orqan sinfi  açır.

T.Yaqubova pedaqoji işlə yanaşı, fəal konsert fəaliyyətinə də rəhbərlik edirdi.  O, “Azərbaycan Mədəniyyət Günləri”ndə, “Qızıl payız” festivallarında, açıq hava konsertlərində “AzGos Konsert”in solisti, 1982-ci ildən isə Moskvada keçirilən “Birlik Konserti”nin solisti olan ilk orqan ifaçısıdır.  

Tahirə Yaqubovanın alətlərin qorunmasına yönəlmiş böyük rolunu qeyd etmək lazımdır: Ü.Hacıbəyli adına BMA-da orqanların bərpası, yeni elektron orqanların alınması, Almaniya, Fransa, İsraildən aparıcı orqançıların tələbələrlə ustad dərsləri keçməyə dəvət olunması professor T.Ə.Yaqubovanın öz sənətinə fanatik bağlılığından xəbər verir.

Qeyd edək ki, T.Yaqubova 40-dan çox elmi tədqiqatın, metodik əsərin, müxtəlif proqram və məqalələrin müəllifidir ki, bunlardan 4 monoqrafiyanı, o cümlədən “Alətlər şahı”, “Orqan terminologiyası lüğəti” kitabı, “Şimali alman məktəbinin registr stilistikasının nəzəriyyəsi və praktikasının problem əlaqəsi haqqında”, həmçinin Q.Qarayevin seçilmiş əsərlərinin və “Azərbaycan Respublikasının himni” ni orqan üçün  köçürmüşdür.

Bir sözlə Tahirə Yaqubova həm musiqi tarixi və nəzəriyyəsi, həm də orqan sənəti sahəsində yüksək ixtisaslı mütəxəssisdir. Onu əlamətdar tarix münasibəti ilə təbrik edir, can sağlığı və uğurlar arzulayırıq.      

Gülnar Mirqasım Rovşən Fortepiano fakültəsinin tyutoru və “Fortepiano, orqan və klavesin” kafedrasının müəllimi