• Bütün bunlara görə Üzeyir Hacıbəyovun yaradıcılığı Azərbaycan xalqının milli sərvətidir. 

    Üzeyir Hacıbəyov şəxsiyyəti Azərbaycan xalqının iftixarı, bizim milli iftixarımızdır.

     

    Heydər Əliyev

     

  • Bəstəkarlar öz əsərlərini yaradarkən, unutmamalıdırlar ki, bizim yaradıcılığımızı xalq qiymətləndirir.

    Çunki xalq yalnız yaradıcı, yalnız bəstəkar deyildir; xalq eyni zamanda misilsiz tənqidçi və musiqi

    əsərlərinin ən yaxşı «istehlakçısıdır», xalq musiqi əsərlərinə diqqətlə yanaşır, yaxşını pisdən seçir.

     

    Üzeyir Hacıbəyli

  • Azərbaycan bəstəkarlıq məktəbinin yaradıcısı, məşhur sovet bəstəkarı Üzeyir Hacıbəyovun musiqisi xalqımızın

    ürəyində yaşayır, onun mə'nəvi həyatını zinətləndirir. Zaman bu böyük iste'dadın qurduğu əzəmətli

    binanı sarsıtmaqdan nəinki acizdir, əksinə, onun getdikcə daha da möhkəmləndiyinə şahid olur.

     

    Qara Qarayev

  • Üzeyir məni özünə xas təmkinlə, çox mehriban bir münasibətlə qarşıladı.

    O gündən başlayaraq, ömrünün axırına qədər ölməz sənətkarın hərarətli münasibətini duydum.

    İlk dəfə şəxsiyyətində hiss etdiyim bu hərarəti get-gedə sənətində də duydum və bütün varlığımla ona bağlandım...

     

    Fikrət Əmirov

    5 iyun 2026-cı il 

    5 iyun 2026-cı il tarixində Azərbaycan Milli İncəsənət Muzeyində Üzeyir Hacıbəyli adına Bakı Musiqi Akademiyasının Simli alətlər kafedrasının baş müəllimi, Azərbaycan Respublikasının Əməkdar müəllimi İlhamə Ağayevanın “Klassik violin musiqisi” adlı konserti keçirilmişdir.

    Konsertin aparıcısı Ləman Əhədova çıxışında İlhamə Ağayevanın çoxillik pedaqoji və ifaçılıq fəaliyyətinin əsas istiqamətləri, Azərbaycan violin ifaçılıq məktəbinin inkişafındakı mühüm xidmətləri, yetişdirdiyi istedadlı musiqiçilər, eləcə də sənətə sonsuz məhəbbəti haqqında ətraflı məlumat vermişdir.
    Konsert proqramında Azərbaycan və Avropa bəstəkarlarının solo və kamera ansamblı üçün yazılmış əsərləri respublika və beynəlxalq müsabiqələr laureatları olan Bakı Musiqi Akademiyasının I tədris ili tələbəsi Maqsud Cəfərli, II tədris ili tələbəsi Səidə Əhmədova, IV tədris ili tələbəsi Ləman İsmayılova, həmçinin Bakı Musiqi Akademiyasının məzunu, Azərbaycan Dövlət Simfonik Orkestrinin artisti Aytac Rzayeva yüksək peşəkarlıqla ifa etmişlər. Gənc musiqiçiləri pianoçular Arzu Səfərova, Zöhrə Salamova və Züleyxa Usubova məharətlə müşayiət etmişlər.
    Tədbirdə Üzeyir Hacıbəyli adına Bakı Musiqi Akademiyasının professor-müəllim heyəti, Bakı şəhərinin incəsənət və musiqi məktəblərinin direktorları, musiqi ictimaiyyətinin nümayəndələri və sənətsevərlər iştirak etmişlər.
    Konsertin sonunda “Dədə Qorqud” Fondu və “Azərbaycan Dünyası” beynəlxalq jurnalının İdarə Heyətinin qərarına əsasən, musiqi təhsilinin inkişafına, gənc istedadların üzə çıxarılmasına və milli musiqi irsinin təbliğinə verdiyi mühüm töhfələrə görə İlhamə Ağayeva “Dünyaya Sülh Naminə” Türk Dünyasının ali mükafatı – “Dədə Qorqud” mükafatı ilə təltif edilmişdir. Mükafatı “Dədə Qorqud” Fondunun prezidenti, ictimai xadim Eldar İsmayıl təqdim etmişdir.

    Konsertdə səsləndirilən əsərlər və gənc musiqiçilərin yüksək səviyyəli ifaları tamaşaçılar tərəfindən böyük maraqla qarşılanmış, sürəkli alqışlarla müşayiət olunmuşdur. Tədbir Azərbaycan violin ifaçılıq məktəbinin nailiyyətlərinin nümayişi, gənc istedadların təqdimatı və klassik musiqi ənənələrinin təbliği baxımından əlamətdar mədəni hadisə kimi yadda qalmışdır.

    Back to Top