Zəfər Gününə həsr olunmuş sinif konserti

25 oktyabr tarixində Niyazi Muzeyində Bakı Musiqi Akademiyasının “İxtisas Fortepiano” kafedrasının müəllimləri — Xalq artisti, professor Ülviyyə Hacıbəyova və dosent, sənətşünaslıq üzrə fəlsəfə doktoru Nərgiz Salmanlının təşəbbüsü ilə Zəfər Gününə həsr olunmuş sinif konserti keçirilmişdir. Konsertin təşkilatı və bədii rəhbərliyi müəllimlərin özləri tərəfindən həyata keçirilmişdir.

Tədbir Vətən uğrunda canından keçmiş şəhidlərimizin xatirəsinin bir dəqiqəlik sükutla yad edilməsi ilə başlamış, ardınca professor Ülviyyə Hacıbəyovanın ifasında Azərbaycan Respublikasının Dövlət Himni səsləndirilmişdir.

Proqram “Müharibə qabağı — Müharibə zamanı — Müharibədən sonra: Zəfərimiz” konsepsiyası əsasında qurulmuş, hər mərhələyə uyğun seçilmiş əsərlər ardıcıllıqla təqdim olunmuşdur. Bu ardıcıllıq dinləyicilərdə tarixi hiss və milli birlik duyğusunu oyatmış, səhnədə yaradılmış musiqi mənzərəsi Vətənpərvərlik ruhunu daha da gücləndirmişdir.

Konsertdə çıxış edən tələbələr:

Kübra Həşimli (IV kurs) — Q. Qarayev Prelüd №3, №14

Dinara Əliyeva (IV kurs) — F. Əmirov Prelüd №2 cis moll

 Maya İsmayılova (IV kurs) — F. Şopen Scherzo №1 b moll; Q. Qarayev, Prelüd №10 e moll

Fidan Muxtarova (Magistr I kurs) — T. Quliyev “Qaytağı”

Nuranə Salamova (Bakalavr I kurs) — F. Şopen Ballada №1 g moll; Z. Bağırov, Fakir

Aişə Fətəliyeva (Bakalavr I kurs) — Q. Qarayev Prelüd №5, №6 (I dəftərdən)

Nigar Novruzova (II kurs) — F. Əmirov Ekspromt №1

Cahan Tağızadə (II kurs) — C. Hacıyev Ballada

Səma Mustafayeva (II kurs) — N. Əliverdibəyov “Bayatı-Şiraz”

Leyla Balayeva — Niyazi Prelüd; Q. Qarayev, Yürüş

Tədbirdə tələbələrin ifaları ilə yanaşı, professor Ülviyyə Hacıbəyova da səhnəyə çıxaraq Azərbaycan Dövlət Himnini ifa etmiş, daha sonra Soltan Hacıbəyovun “Lay-lay” kompozisiyasını təqdim etmişdir. Həmçinin Ü.Hacıbəyovanın proqramında görkəmli bəstəkar Arif Məlikovun əsərlərindən ibarət seleksiya — onun musiqi dilinin müxtəlif çalarlarını bir araya gətirən, ardıcıl və hissiyyatlı bir musiqi parçası  səsləndirilmişdir. Bu yığma parça həm bəstəkarın yaratdığı melodik xəttin zənginliyini, həm də konsertin ümumi ab-havasına uyğun xatirə və ehtiramı ifadə etmişdir.

Konsert yüksək səviyyədə təşkil olunmuş, ifa keyfiyyəti və proqramın ideya-sənət əlaqəsi dinləyicilər tərəfindən böyük rəğbətlə qarşılanmışdır. Musiqinin dili vasitəsilə göstərilən ehtiram və qürur hissi Zəfər Gününün əhəmiyyətini daha da vurğulamışdır.