• Bütün bunlara görə Üzeyir Hacıbəyovun yaradıcılığı Azərbaycan xalqının milli sərvətidir. 

    Üzeyir Hacıbəyov şəxsiyyəti Azərbaycan xalqının iftixarı, bizim milli iftixarımızdır.

     

    Heydər Əliyev

     

  • Bəstəkarlar öz əsərlərini yaradarkən, unutmamalıdırlar ki, bizim yaradıcılığımızı xalq qiymətləndirir.

    Çunki xalq yalnız yaradıcı, yalnız bəstəkar deyildir; xalq eyni zamanda misilsiz tənqidçi və musiqi

    əsərlərinin ən yaxşı «istehlakçısıdır», xalq musiqi əsərlərinə diqqətlə yanaşır, yaxşını pisdən seçir.

     

    Üzeyir Hacıbəyli

  • Azərbaycan bəstəkarlıq məktəbinin yaradıcısı, məşhur sovet bəstəkarı Üzeyir Hacıbəyovun musiqisi xalqımızın

    ürəyində yaşayır, onun mə'nəvi həyatını zinətləndirir. Zaman bu böyük iste'dadın qurduğu əzəmətli

    binanı sarsıtmaqdan nəinki acizdir, əksinə, onun getdikcə daha da möhkəmləndiyinə şahid olur.

     

    Qara Qarayev

  • Üzeyir məni özünə xas təmkinlə, çox mehriban bir münasibətlə qarşıladı.

    O gündən başlayaraq, ömrünün axırına qədər ölməz sənətkarın hərarətli münasibətini duydum.

    İlk dəfə şəxsiyyətində hiss etdiyim bu hərarəti get-gedə sənətində də duydum və bütün varlığımla ona bağlandım...

     

    Fikrət Əmirov

    26 sentyabr  2025-ci il 

    Bakı Musiqi Akademiyasında Üzeyir Hacıbəylinin 140 illiyinə həsr olunmuş konsert keçirildi.

    Heydər Əliyev Fondu və Azərbaycan Respublikası Mədəniyyət Nazirliyinin təşkilatçılığı ilə keçirilən XVII Beynəlxalq Musiqi Festivalı çərçivəsində növbəti tədbir 26 sentyabr 2025-ci il tarixində baş tutdu.

    Üzeyir Hacıbəyli adına Bakı Musiqi Akademiyasının Böyük zalında təşkil olunan “Üzeyir bəyin ocağında” adlı konsert dahi bəstəkar, Azərbaycan professional musiqi məktəbinin banisi Üzeyir Hacıbəylinin 140 illik yubileyinə həsr olunmuşdur.

    Konsertdə Akademiyanın istedadlı tələbələri çıxış edərək Üzeyir Hacıbəylinin əsərlərini böyük məhəbbətlə ifa etdilər. Proqramda bəstəkarın “Arazbarı”, “Aşıqsayağı”, “Sənsiz” və “Sevgili canan” romansları, “Arşın mal alan” musiqili komediyasından Gülçöhrənin ariyası, İki saylı Fantaziyası, həmçinin Emil Əfrasiyabın “Parafraz” əsəri səsləndirildi.

    Səhnədə Hüseynağa Aslanov (qiraət), Zərif Kərimova (qiraət), Əli Adıgözəlov (piano), Əsmər Alxazova (piano), Elçin Məmmədov (piano), Aysun Mahmudzadə (vokal), Hidayət Sadıqbəyli (piano), İluzər İbrahimzadə (piano), İsmayıl Əsədbəyli (vokal), Özcan Cabbari (violin), Nəzrin Qulamova (piano), Ülviyyə Mustafazadə (violonçel), Zəminə Kərimova (piano) uğurlu çıxışları ilə tamaşaçıların rəğbətini qazandılar.

    Konsertin xüsusi qonaqları sırasında Beynəlxalq Muğam Mərkəzinin nəzdində C.Cahangirov adına xor da olmuşdur. Xorun bədii rəhbəri – Azərbaycan Respublikasının Əməkdar artisti Təranə Yusifova kollektivlə birgə parlaq ifası ilə tədbirə xüsusi rəng qatdı.

    Bakı Musiqi Akademiyasının Böyük zalında keçirilən bu konsert, festival iştirakçıları və musiqisevərlər üçün həm unudulmaz musiqi bayramına, həm də Üzeyir Hacıbəylinin zəngin irsinin təntənəsinə çevrildi.

    Back to Top