BMA-nın İxtisas musiqi məktəb-studiyasının 45 illik yubileyinə həsr olunmuş konsert

 2025-ci il 30 iyun tarixində Üzeyir Hacıbəyli adına Bakı Musiqi Akademiyasının Kiçik zalında İxtisas musiqi məktəb-studiyasının şagirdlərinin iştirakı ilə növbəti konsert keçirildi. Sözügedən tədbir məktəb-studiyanın 45 illik yubileyinə həsr olunmuşdur və özünəməxsus zəngin musiqi proqramı ilə yadda qaldı.

Konsert proqramı məzmununa və ifa səviyyəsinə görə olduqca rəngarəng idi. Proqramda Azərbaycan və dünya bəstəkarlarının müxtəlif üslub və janrlarda yazılmış seçmə əsərləri səsləndirildi. Bu musiqi çələngi gənc ifaçıların texniki bacarıqlarını, musiqi duyumunu və estetik zövqünü nümayiş etdirməklə yanaşı, onların pedaqoqları tərəfindən görülmüş ciddi metodik və yaradıcı işin də göstəricisi idi.

Tədbirdə iştirak edən şagirdlər fortepiano, violin və vokal ixtisasları üzrə təhsil alan, gələcəyin peşəkar musiqiçiləri kimi yetişən gənclərdir. Onların hər birinin ifası başda məktəb-studiyanın direktoru, sənətşünaslıq üzrə fəlsəfə doktoru, dosent Sevda Məmmədova olmaqla müəllimlərin diqqətli və məsuliyyətli hazırlıq prosesindən, valideynlərin dəstəyi və övladlarının sənət yoluna olan marağından qaynaqlanırdı. Auditoriyada əyləşən müəllim və valideynlər ifaları böyük maraq və qürur hissi ilə izləyir, hər bir çıxışı alqışlarla qarşılayırdılar.

Sonda tədbir iştirakçıları – həm gənc ifaçılar, həm də onları hazırlayan müəllimlər və dinləyicilər konsertdən məmnun qaldıqlarını ifadə etdilər. Bu kimi tədbirlər, təkcə gənc musiqiçilərin səhnə təcrübəsinin formalaşmasına deyil, həm də musiqi təhsili sistemində ənənələrin qorunub saxlanması və gələcək nəsillərə ötürülməsi baxımından mühüm əhəmiyyət daşıyır.

BMA-nın İxtisas musiqi məktəb-studiyasının

elmi-metodiki işlər üzrə direktor müavini,

sənətşünaslıq üzrə fəlsəfə doktoru

Aytən Baxşiyeva

8

4

6

5

7

3

2

1