22 may tarixində Azərbaycan Respublikası Mədəniyyət Nazirliyinin Muzey Mərkəzində 3-cü Bakı Müasir Musiqi Günləri festivalı çərçivəsində bəstəkar, BMA-nın “Tarix-nəzəriyyə” fakültəsinin dosenti Aliyə Məmmədovanın solo gitara üçün “Sükutla dialoq” əsəri istedadlı musiqiçi Raul Hüseynov tərəfindən səsləndirilmişdir.  

Qeyd edək ki, A.Məmmədovanın 1994-cü ildə solo gitara üçün yazdığı “Sükutla dialoq” əsəri Azərbaycan kamera-instrumental musiqisi ədəbiyyatında gitara üçün ilk əsərlərdəndir. 

Əsərin ilk ifaçısı istedadlı gitaraçı Rövşən Məmmədov olmuşdur. Burada müəllif minimal yüksəklik imkanı ilə əldə olunan poetik, melanxolik obrazı olduca təsirli şəkildə təfsir etməyə nail olur.  

3 hissəli struktura malik kompozisiya cəmi 6 səsdən ibarət seriya üzərində qurulub – a, h, c, d, e, fis). 

 “Sükutla dialoq”u sonralar isveçrəli gitara ifaçısı, “TaG” ansamblının solisti Christoph Jäggin ifa etmişdir. 1996-cı ildə bu əsər İsveçrənin TRE MEDİA nəşriyyatı tərəfindən nəşr olunub. Həmin illərdə TaG ansamblı İsveçrə, Rusiya və Bakıda keçirilən musiqi festivalını əsərin adı ilə – “Sükutla dialoq” adlandırılmışdı.

Vurğulamaq gərəkdir ki, 3-cü Bakı Müasir Musiqi Günləri festivalı may ayının 19-da start götürmüş və 25-i tarixinədək davam edəcək. Festival çərçivəsində ustad dərsləri, mühazirə və konsertlər, o cümlədən, film nümayişi reallaşdırılacaq.