Sentyabrın 18-də, məhz Azərbaycan Milli Musiqi Günündə Bakıda Rus Evində Beynəlxalq müsabiqələr laureatı, Üzeyir Hacıbəyli adına Bakı Musiqi Akademiyasının (BMA) İxtisas musiqi məktəb-studiyasının məzunu, hazırda
N.A.Rimski-Korsakov adına Sankt-Peterburq Dövlət Konservatoriyasının tələbəsi Teymur Kazımovun solo konserti keçirilib.

Tədbir Bakıdakı Rus Evi və Bakı Musiqi Akademiyasının birgə təşkilatçılığı ilə baş tutub.

Musiqili gecənin əvvəlində Bakıdakı Rus Evinin rəhbəri İrek Zinnurov salamlama nitqi ilə tamaşaçılara müraciət edib.

Tədbirin aparıcısı və kuratoru, sənətşünaslıq üzrə fəlsəfə doktoru, BMA-nın baş müəllimi Alyona İnyakina gənc ifaçının son bir ildə qazandığı uğur və nailiyyətlərdən danışıb. Artıq istedadı ilə bir çox ölkələri fəth etmiş gənc musiqiçi müxtəlif dövrlərə, üslub cərəyanlarına aid əsərlərin ifası ilə yüksək musiqi sənətinin pərəstişkarlarını sevindirməyi bacarmışdır.

Bu axşam Rusiya Evinin tamaşaçılarını da sürpriz gözləyirdi - Teymur Kazımovun yeni mahnısına çəkilmiş klipin premyerası təqdim olundu.

Konsert proqramında gənc ifaçının dostları və həmkarları: beynəlxalq müsabiqələr laureatı, BMA-nın konsertməysteri Dilarə Kərimova, musiqiçi, əfsanəvi opera müğənnisi Lütfiyar İmanovun oğlu Rauf İmanov, bəstəkar və ifaçı
Lalə Əhmədova iştirak ediblər.

Qala gecəsi M.Maqomayevin hamının sevimlisi olan “Azərbaycan” mahnısının ifası ilə başa çatıb.