27 iyun 2024-cü il
Ali musiqi təhsil ocağı olan Üzeyir Hacıbəyli adına Bakı Musiqi Akademiyasında artıq neçə ildir ki, hər dərs ilinin sonu ən gözəl təəssüratlarla yadda qalan "Məzun günü" keçirilir.
27 iyun 2024-cü il tarixində Üzeyir Hacıbəyli adına Bakı Musiqi Akademiyasının tarixində növbəti möhtəşəm, rəngarəng və unudulmaz "Məzun günü" keçirildi. Bu qədim təhsil ocağında keçirilən "Məzun günü"nü ənənəvi olaraq Bakı Musiqi Akademiyasının rektoru, SSRİ və Azərbaycan Respublikasının Xalq artisti, dünya şöhrətli pianoçu, professor Fərhad Bədəlbəyli öz çıxışı ilə açıq elan etdi. Xoş arzularla çıxış edən cənab rektor Fərhad Bədəlbəyli bütün məzunları ürəkdən təbrik edərək, gələcək həyatlarında uğur və nailiyyət qazanmağı arzuladı.
Bunun ardınca Azərbaycan Respublikasının Xalq artisti, BMA-nın Beynəlxalq əlaqələr, Sosial Məsələlər və İctimaiyyətlə əlaqələr üzrə prorektoru, professor Yeganə Axundova çıxış edərək, Akademiyanın yaranması, keçdiyi yol, qazandığı uğurlar, fəxri məzunları haqqında ətraflı çıxış etdi.
Daha sonra bakalavr pilləsini “Musiqişünaslıq” ixtisası üzrə fərqlənmə diplomu ilə bitirən məzun, Beynəlxalq konfransların iştirakçısı Vəfa Əhmədbəyova məzunlar adından professor-müəllim heyətinə minnətdarlığını bildirib, məzunları təbrik etdi.
Çıxış və təbriklərdən sonra tədbirin musiqili hissəsinə yer verildi.
Öncə “İfaçılıq” fakültəsinin nəfəs alətləri ixtisası üzrə magistr pilləsini bitirən məzun beynəlxalq müsabiqələr laureatı İlahə Məmmədova (Müşayiət edir: Fortepiano fakültəsinin magistr pilləsini bitirən məzun, beynəlxalq müsabiqələr laureatı Aydan Yeşildağ) Süleyman Ələsgərovun “Daimi hərəkət”, “İfaçılıq” fakültəsinin Vokal sənəti ixtisası üzrə magistr pilləsini bitirən məzun beynəlxalq müsabiqələr laureatı Safura Aslanova (Müşayiət edir: İlahə İsmayılova) Tofiq Əhmədovun “Çiçəklər sevinsin”, Bakalavr pilləsinin Bəstəkarlıq ixtisası üzrə bitirən məzun, beynəlxalq müsabiqələr laureatı Fatimə Məmmədzadənin fortepiano üçün prelüdü, İfaçılıq fakültəsinin Nəfəs alətləri ixtisası üzrə bakalavr pilləsini bitirən məzun beynəlxalq müsabiqələr laureatı Aslan İslamov
(Müşayiət edir: Fortepiano fakültəsinin bakalavr pilləsini bitirən məzun, beynəlxalq müsabiqələr laureatı Fatimə Hacızadə) Fikrət Əmirovun “Elegiya”, “İfaçılıq” fakültəsini Viola ixtisası üzrə bakalavr pilləsini bitirən məzun, beynəlxalq müsabiqələr laureatı Humay Hacızadə
(Müşayiət edir: Xalq artisti Yeganə Axundova) Edvard Elqarın “Salut de amor”, “Fortepiano” fakültəsinin bakalavr pilləsini bitirən məzun, Prezident təqaüdçüsü, beynəlxalq müsabiqələr laureatı Rəşid Behbudov Aleksandr Skryabinin Etüd N12 op.8 əsərlərini yüksək peşəkarlıqla ifa etdilər.
Unudulmaz günün əsas mərhələsi isə məzunların rektor, prorektor və dekanların iştirakı ilə diplomlarının təqdimat mərasimi oldu.
Sonda çəkilən xatirə şəkilləri, bütün bu illər ərzində tələbələrə dəstək olan dəyərli müəllimlərdən xoş sözlər eşitmək yaddaşlardan silinməyən bir günə çevrildi.
Biz də öz növbəmizdə məzunları təbrik edir, gələcək həyatlarında uğurlar arzu edirik!
