21 noyabr 2023-cü il tarixində Üzeyir Hacıbəyli adına Bakı Musiqi Akademiyasında  Əməkdar müəllim, “Fortepiano” fakültəsinin dekanı, professor Nəzakət Rimazi və Əməkdar müəllim, “Konsertmeyster ustalığı” kafedrasının müdiri, professor Gülnarə Acalovanın tələbələrinin ifasında olduqca maraqlı konsert keçirildi. 

Konsert gecəsində Respublika və Beynəlxalq müsabiqələr laureatları Zeyn Cəfərov, Ayan Aslanova, Əsmər Alxazova, Hüseyn Nağıyev, Zəhra Cahan Şıxaliyeva, İluzər İbrahimzadə, Şəkərxanım Cavadzadə, Şərif Bağırov, Camalə Abdinzadə, Orxan Hüseynov Nərminə İsmayılova, Kamran Talıblı, Rəvan Əhmədzadə, Azər Səfərzadə  parlaq ifaları ilə dinləyicilərdə xoş təəssüratlar yaratdılar. 

Rəngarəng konsert proqramında Sergey Raxmaninovun “Romans”, Friderik Şopenin “Rondo”, Fikrət Əmirovun  “Sevil” operası mövzuları əsasında Fantaziya, Feliks Mendelsonun “Skertso”, Luici Bassi – Cüzeppe Verdinin  “Rigoletto” operası mövzuları əsasında Konsert - Fantaziya, Ceyhun Allahverdiyevin “Eskizlər”, David Popperin “Konsert - Polonez” op.14, Klod Bolinqin  “Fleyta və caz trio üçün Süita”dan “Sentimental”, Bedrjix Smetananın İki fortepianoda  səkkiz əl üçün Sonata e moll əsərləri səsləndirildi.

Gənc və istedadlı musiqiçilərin məharətli ifaları dinləyicilər tərəfindən böyük rəğbətlə qarşılandı. 

Beləliklə, konsert gecəsi tamaşaçıların gurultulu alqış sədalarlı altında başa çatdı. 

3

2

4

1