17 oktyabr 2023-cü il tarixində  Beynəlxalq Muğam Mərkəzində Ümummilli lider Heydər Əliyevin anadan olmasının 100-cü ildönümünə həsr olunmuş Azərbaycan Respublikası Mədəniyyət Nazirliyinin dəstəyi, “İrəli” ictimai birliyinin təşkilatçılığı ilə həyata keçirilən “MədəniyyətimİZ” layihəsi çərçivəsində növbəti görüş keçirildi. Tədbirin qonaqları SSRi və Azərbaycan Respublikasının Xalq artistləri, “Şöhrət”, “Şərəf”, “İstiqlal” ordenli, görkəmli opera ifaçıları Fidan Qasımova və Xuraman Qasımova idilər.

Bu dəfə keçirilən görüş zəngin musiqi, incəsənət və mədəni irsi bir araya gətirdi. Gecədə Ümummilli lider Heydər Əliyevin  Xalq artistləri Fidan Qasımova və Xuraman Qasımovanın xatirə şəkillərindən, görkəmli opera ifaçılarının ifalarından ibarət video-çarx tamaşaçılara təqdim olundu. Tədbir boyu Əməkdar artistlər Nigar Məlikova və Rəna Ağayevanın pianoda müşayiət ilə Xalq artisti Samir Cəfərov, Əməkdar artist Fəridə Məmmədova, Əməkdar artist Aqşin Abdullayev və Fatimə Cəfərzadənin füsunkar musiqi nömrələri səsləndirildi. 

“MədəniyyətimİZ” layihəsi çərçivəsində baş tutan görüşdə ölkə gənclərinin yaradıcılıq fəaliyyətlərinin stimullaşdırılması məqsədilə həyata keçirilən müxtəlif dövlət proqramları və layihələr, peşəkar musiqi mədəniyyətimizin təbliği, müasir tendensiyalarla milli musiqi ifaçılığının sintezi məsələləri geniş müzakirə olundu.  

Dünya şöhrətli opera ifaçıları ilə canlı ünsiyyətdə olmaq arzusunda olan geniş auditoriya kütləsi musiqili gecədən böyük zövq alaraq, tədbiri xatirə şəkilləri ilə əbədiləşdirdilər.

https://xalqqazeti.az/az/medeniyyet/144537-beynelxalq-mugam-merkezinde-xalq-artistleri