25 iyun 2023-cü il
Ali musiqi təhsil ocağı olan Üzeyir Hacıbəyli adına Bakı Musiqi Akademiyasında artıq neçə ildir ki, hər dərs ilinin sonu ən gözəl təəssüratlarla yadda qalan "Məzun günü" keçirilir.
25 iyun 2023- cü il tarixində Üzeyir Hacıbəyli adına Bakı Musiqi Akademiyasının tarixində növbəti möhtəşəm, rəngarəng və unudulmaz "Məzun günü" keçirildi. Bu qədim təhsil ocağında keçirilən "Məzun günü"nü ənənəvi olaraq Bakı Musiqi Akademiyasının rektoru, SSRİ və Azərbaycan Respublikasının Xalq artisti, dünya şöhrətli pianoçu, professor Fərhad Bədəlbəyli öz çıxışı ilə açıq elan etdi. Xoş arzularla çıxış edən cənab rektor Fərhad Bədəlbəyli bütün məzunları ürəkdən təbrik edərək, gələcək həyatlarında uğur və nailiyyət qazanmağı arzuladı.
Bunun ardınca Azərbaycan Respublikasının Xalq artisti, BMA-nın Beynəlxalq əlaqələr Sosial Məsələlər və İctimaiyyətlə əlaqələr üzrə prorektoru, professor Yeganə Axundova çıxış edərək Akademiyanın yaranması, keçdiyi yol, qazandığı uğurlar, fəxri məzunları haqqında ətraflı çıxış etdi.
Daha sonra məzunlar adından “Tarix- nəzəriyyə”fakültəsini fərqlənmə diplomu ilə bitirən Fidan Əliyarzadə çıxış edərək, Akademiyanın professor-müəllim heyətini və məzunları təbrik etdi.
Çıxış və təbriklərdən sonra tədbirin musiqili hissəsinə yer verildi.
Öncə “İfaçılıq” fakültəsini skripka ixtisası üzrə fərqlənmə diplomu ilə bitirən məzun, beynəlxalq müsabiqələr laureatı Osman Mustafazadə çıxış edərək Kreyslerin "Çin tamburini", İfaçılıq fakültəsini klarnet ixtisası üzrə fərqlənmə diplomu ilə bitirən məzun, beynəlxalq müsabiqələr laureatı Kənan Xəlilzadə Alamiro Giampierinin "Venesiya karnavalı", “İxtisas Fortepiano” fakültəsinin məzunları, beynəlxalq müsabiqələr laureatları, fərqlənmə diplomu ilə bitirən Cəmalə Abdinzadə və Əzizə Ağazadə Fazil Sayın "Night", “İfaçılıq” fakültəsini solo oxuma ixtisası üzrə bitirən məzun Leyla Baxışova Robert Şumanın "İthaf", “İfaçılıq” fakültəsini skripka ixtisası üzrə fərqlənmə diplomu ilə bitirən məzun, beynəlxalq müsabiqələr laureatı, Prezident təqaüdçüsü Zərrin Əliyeva Niyazinin "Rast" əsərlərini yüksək peşəkarlıqla ifa etdilər.
Daha sonra Magistr pilləsini bəstəkarlıq ixtisası üzrə bitirən məzun, respublika və beynəlxalq müsabiqələr laureatı, Vətən müharibəsi qazisi, “Cəsur döyüşçü” medalı, “Füzulinin azad olunmasına görə”, “Qubadlının azad olunmasına görə”, “Şuşanın azad olunmasına görə”, “Vətən müharibəsi iştirakçısı” medalları almış, Azərbaycan bəstəkarlar ittifaqının üzvü, 2021-ci ildə Gənclər və İdman Nazirliyinin “İlin ən yaxşı bəstəkarı” nominasıyası üzrə mükafata layiq görülmüş, Amerikanın NEFTLİX film production tərəfindən dəvət alaraq və qardaş ölkə Türkiyə ilə birgə çəkilən “Dirçəliş: Osmanlı İmperiyası” serialına musiqi bəstələmiş, Almaniyanın BFC film production qısa metrajlı filmlərin istehsalı olan 3 filmə musiqi bəstələmiş fəxrimiz Vüqar Məmmədzadənin triosu səsləndi.
Trionu Bakı Musiqi Akademiyasının məzunları, beynəlxalq müsabiqələr laureatları, Prezident təqaüdçüləri Orxan Hüseynov, Şəms Ağazadə və Gülnaz Eldarlı ifa etdi.
Unudulmaz günün əsas mərhələsi isə məzunların rektor, prorektorlar və dekanların iştirakı ilə diplomlarının təqdimat mərasimi oldu.
Sonda çəkilən xatirə şəkilləri, bütün bu illər ərzində tələbələrə dəstək olan dəyərli müəllimlərdən xoş sözlər eşitmək yaddaşlardan silinməyən bir günə çevrildi.
Biz də öz növbəmizdə məzunları təbrik edir, gələcək həyatlarında uğurlar arzu edirik!
