• Bütün bunlara görə Üzeyir Hacıbəyovun yaradıcılığı Azərbaycan xalqının milli sərvətidir. 

    Üzeyir Hacıbəyov şəxsiyyəti Azərbaycan xalqının iftixarı, bizim milli iftixarımızdır.

     

    Heydər Əliyev

     

  • Bəstəkarlar öz əsərlərini yaradarkən, unutmamalıdırlar ki, bizim yaradıcılığımızı xalq qiymətləndirir.

    Çunki xalq yalnız yaradıcı, yalnız bəstəkar deyildir; xalq eyni zamanda misilsiz tənqidçi və musiqi

    əsərlərinin ən yaxşı «istehlakçısıdır», xalq musiqi əsərlərinə diqqətlə yanaşır, yaxşını pisdən seçir.

     

    Üzeyir Hacıbəyli

  • Azərbaycan bəstəkarlıq məktəbinin yaradıcısı, məşhur sovet bəstəkarı Üzeyir Hacıbəyovun musiqisi xalqımızın

    ürəyində yaşayır, onun mə'nəvi həyatını zinətləndirir. Zaman bu böyük iste'dadın qurduğu əzəmətli

    binanı sarsıtmaqdan nəinki acizdir, əksinə, onun getdikcə daha da möhkəmləndiyinə şahid olur.

     

    Qara Qarayev

  • Üzeyir məni özünə xas təmkinlə, çox mehriban bir münasibətlə qarşıladı.

    O gündən başlayaraq, ömrünün axırına qədər ölməz sənətkarın hərarətli münasibətini duydum.

    İlk dəfə şəxsiyyətində hiss etdiyim bu hərarəti get-gedə sənətində də duydum və bütün varlığımla ona bağlandım...

     

    Fikrət Əmirov

    26 noyabr 2021-ci il

    26 noyabr 2021-ci il tarixində Azərbaycan Bəstəkarlar İttifaqının Üzeyir Hacıbəyli adına Konsert salonunda dahi şair, mütəfəkkir Nizami Gəncəviyə həsr olunan "Nizami və musiqi" adlı konsert keçirildi.

    Gecənin proqramına Nizami poeziya müsabiqəsinin iştirakçıları, qaliblərinin sözlərinə və Üzeyir Hacıbəyli adına Bakı Musiqi Akademiyasının məzunları olan gənc bəstəkarların musiqilərinə yazılmış kamera-vokal əsərləri daxil edilmişdir.

    Konsertdə səs və fortepiano üçün Nizami və Hakim Məmmədlinin sözlərinə "Gözüm aydın", Vəfa Bağırzadə - "Eşq", Elvin Quliyev - "Gecə", Ümidə Fətəliyeva - "Ey dost", Lalə Əhmədova - "Görünür" və Aidan Əliyeva - "Olacaqsan", həmçinin instrumental ansamblın müşayiətilə səs üçün yazılmış  Ülkər Aşurbəyovanın "Gözüm aydın", "Gözümə sürəti canan görünür"  və Sara Dilrubanın "Bu qəlbim ahü-zar etdi" romansları səsləndirildi.

    Gənc bəstəkarların əsərlərini gənc xanəndə və instrumental ifaçılar, klassik və xalq çalğı alətlərinin ifaçıları - Əməkdar artist Toğrul Əsədullayev (kamança), vokalçılar İlkin Abdullayev, Sübhan Rüstəmov, Cəlal İsayev (tenor), Eleonora Mustafayeva (soprano), Rza Xosrovzadə (bariton), pianoçular Fuad Əlizadə, Aynur Xəlilova, Rəhimə Qurbanova, arfa ifaçısı Fəridə Ələkbərli, balaban ifaçısı Anar Vəlizadə, İbrahim Yusifli (qaval) təqdim ediblər.  Nizami Gəncəviyə həsr olunan tədbirlər silsiləsi konserti dinləyicilərin gurultulu alqışları ilə başa çatdı.

    Qeyd edək ki, N.Gəncəvi ili çərçivəsində elmi-praktiki musiqişünaslıq konfransları, Nizaminin şeirləri üzrə ən yaxşı romans-qəzəl  müsabiqəsi və digər tədbirlər təşkil olunmuşdur.

    Back to Top