• Bütün bunlara görə Üzeyir Hacıbəyovun yaradıcılığı Azərbaycan xalqının milli sərvətidir. 

    Üzeyir Hacıbəyov şəxsiyyəti Azərbaycan xalqının iftixarı, bizim milli iftixarımızdır.

     

    Heydər Əliyev

     

  • Bəstəkarlar öz əsərlərini yaradarkən, unutmamalıdırlar ki, bizim yaradıcılığımızı xalq qiymətləndirir.

    Çunki xalq yalnız yaradıcı, yalnız bəstəkar deyildir; xalq eyni zamanda misilsiz tənqidçi və musiqi

    əsərlərinin ən yaxşı «istehlakçısıdır», xalq musiqi əsərlərinə diqqətlə yanaşır, yaxşını pisdən seçir.

     

    Üzeyir Hacıbəyli

  • Azərbaycan bəstəkarlıq məktəbinin yaradıcısı, məşhur sovet bəstəkarı Üzeyir Hacıbəyovun musiqisi xalqımızın

    ürəyində yaşayır, onun mə'nəvi həyatını zinətləndirir. Zaman bu böyük iste'dadın qurduğu əzəmətli

    binanı sarsıtmaqdan nəinki acizdir, əksinə, onun getdikcə daha da möhkəmləndiyinə şahid olur.

     

    Qara Qarayev

  • Üzeyir məni özünə xas təmkinlə, çox mehriban bir münasibətlə qarşıladı.

    O gündən başlayaraq, ömrünün axırına qədər ölməz sənətkarın hərarətli münasibətini duydum.

    İlk dəfə şəxsiyyətində hiss etdiyim bu hərarəti get-gedə sənətində də duydum və bütün varlığımla ona bağlandım...

     

    Fikrət Əmirov

    4 oktyabr 2019-cu il

    Azərbaycan Respublikası Dağlıq Qarabağ bölgəsinin Azərbaycan icmasının Bakı Musiqi Akademiyasında təşkil olunan görüş

    4 oktyabr 2019-cu il tarixində Üzeyir Hacıbəyli adına Bakı Musiqi Akademiyasının Böyük zalında Azərbaycan Respublikası Dağlıq Qarabağ bölgəsinin Azərbaycan İcmasının BMA-nın müəllim və tələbə heyəti ilə görüşü keçirildi.        

    İlk öncə Akademiyanın rektoru, professor Fərhad Bədəlbəyli hər kəsi salamladı, düşmən tapdağı altında qalaraq dağıdılan Şuşa şəhərinin zəngin mədəniyyət ocağı olmasının gələcək nəsillərə ötürülməsini  və Azərbaycançılıq idealogiyasının, mədəniyyətimizin xarici ölkələrdə usanmadan təbliğ olunmasını gənclərə tövsiyə etdi.    

    Sonra isə separatçı qüvvələrlə sosial şəbəkələrdən mübarizə aparan, Dağlıq Qarabağ bölgəsinin mədəniyyətini virtual aləmdə təbliğ edən həmyerlimiz Tural Gəncəliyevə söz verildi.        

    Azərbaycan Respublikası Dağlıq Qarabağ ərazisinin azərbaycanlı icmasının rəhbəri Tural Gəncəliyev Dağlıq Qarabağın mədəniyyət mərkəzi olan Şuşa şəhəri ilə bağlı uşaqlıq xatirələrini bölüşdü. Daha sonra Şuşa şəhərinin memarlığının və mühüm tarixi abidələrinin erməni silahlı qüvvələri tərəfindən dağılmadan öncə və hazırkı viran qoyulmuş vəziyyətini slayd şəklində tamaşaçılara təqdim etdi. O, həmçinin müasir dövrün tələblərinə uyğun olaraq, Azərbaycan mədəniyyətinin müxtəlif sahələrinin sosial şəbəkələr vasitəsilə xarici ölkələrə inteqrasiya olunması və zəruriliyini vurğuladı, bu sahədə də mühüm işlər görüldüyünü vurğuladı.

    Daha sonra Azərbaycan Respublikasının xalq artisti, professor Ramiz Quliyev də çıxış edərək, sosial şəbəkələr vasitəsilə mədəniyyətimizin təbliğ edilməsi ideyasını dəstəklədiyini və təqdirəlayiq hal kimi qiymətləndirdiyini bildirdi.        

    Ardınca musiqi proqramına yer verildi. Proqramda N.Əliverdibəyovun “Bayatı Şiraz” (ifa etdi Bakı Musiqi Akademiyasının tələbəsi, beynəlxalq müsabiqələr laureatı Nigar Məmmədova); Niyazinin “Rast” simfonik muğamından fraqmentlər (ifa etdi BMA-nın  tələbəsi, beynəlxalq müsabiqələr laureatı, prezident təqaüdçüsü Zərrin Əliyeva, müşayiət etdi Arzu Səfərova); Ü.Hacıbəylinin “Sevgili canan” romans-qəzəli (ifa etdi BMA-nın məzunu, beynəlxalq müsabiqələr laureatı Mahir Tağızadə, müşayiət etdi Dilarə Kərimova); “Qarabağ” şikəstəsi (ifa etdi Azərbaycan televiziyası muğam müsabiqəsinin laureatı, IV beynəlxalq müsabiqəsinin qalibi Orxan Hüseynli, tarda Ədalət Behbudov, kamançada Pərviz Fərhadov müşayiət etdilər) ifa olundu.

    Görüş çoxsaylı qonaqlar tərəfindən xoş təəssüratlarla yekunlaşdırıldı.

     

     

     

                                                   Bakı Musiqi Akademiyası Mətbuat xidməti   

                                                                      İsgəndərova Ofelya

    Back to Top