• Bütün bunlara görə Üzeyir Hacıbəyovun yaradıcılığı Azərbaycan xalqının milli sərvətidir. 

    Üzeyir Hacıbəyov şəxsiyyəti Azərbaycan xalqının iftixarı, bizim milli iftixarımızdır.

     

    Heydər Əliyev

     

  • Bəstəkarlar öz əsərlərini yaradarkən, unutmamalıdırlar ki, bizim yaradıcılığımızı xalq qiymətləndirir.

    Çunki xalq yalnız yaradıcı, yalnız bəstəkar deyildir; xalq eyni zamanda misilsiz tənqidçi və musiqi

    əsərlərinin ən yaxşı «istehlakçısıdır», xalq musiqi əsərlərinə diqqətlə yanaşır, yaxşını pisdən seçir.

     

    Üzeyir Hacıbəyli

  • Azərbaycan bəstəkarlıq məktəbinin yaradıcısı, məşhur sovet bəstəkarı Üzeyir Hacıbəyovun musiqisi xalqımızın

    ürəyində yaşayır, onun mə'nəvi həyatını zinətləndirir. Zaman bu böyük iste'dadın qurduğu əzəmətli

    binanı sarsıtmaqdan nəinki acizdir, əksinə, onun getdikcə daha da möhkəmləndiyinə şahid olur.

     

    Qara Qarayev

  • Üzeyir məni özünə xas təmkinlə, çox mehriban bir münasibətlə qarşıladı.

    O gündən başlayaraq, ömrünün axırına qədər ölməz sənətkarın hərarətli münasibətini duydum.

    İlk dəfə şəxsiyyətində hiss etdiyim bu hərarəti get-gedə sənətində də duydum və bütün varlığımla ona bağlandım...

     

    Fikrət Əmirov

    7 iyul 2026-cı il

    7 iyul 2026-cı il tarixində Ü.Hacıbəyli adına Bakı Musiqi Akademiyasında (BMA) “Şifahi ənənəli Azərbaycan professional musiqisi və onun yeni istiqamətlərinin tədqiqi: Orqanoloqiya və Akustika” elmi tədqiqat laboratoriyasının böyük elmi işçisi,

    sənətşünaslıq üzrə fəlsəfə doktoru, dosent Məhəmməd Vəliyev tərəfindən elmi seminar keçirilmişdir.

    Tədqiqatçı seminar çərçivəsində dahi bəstəkar, professional musiqi sənətimizin banisi Üzeyir Hacıbəylinin tamamlanmamış, lakin musiqi tariximizdə xüsusi çəkiyə malik olan ”Firuzə” operası haqqında geniş məruzə ilə çıxış etmişdir.  İlk öncə Hacıbəyovlar nəslinin musiqi mədəniyyətimizdəki  yeri və rolu, xidmətləri mövzusunda çıxış etmiş, ardından Ü.Hacıbəyli yaradıcılığı üzərində xüsusilə dayanmışdır.

    Məruzəçi Məhəmməd Vəliyev öz çıxışında “Firuzə” operasının yaranma tarixinə, əsərin bədii-estetik xüsusiyyətlərinə və bəstəkarın yaradıcılıq irsindəki roluna işıq salıb. Tədqiqatçı operanın nadir materialları, qorunub saxlanılmış fraqmentləri və musiqi dili üzərində aparılan elmi təhlilləri seminar iştirakçılarının diqqətinə çatdırıb. Qeyd olunub ki, Üzeyir Hacıbəylinin dramaturji təfəkkürünün parlaq nümunəsi olan bu əsərin dərindən öyrənilməsi musiqi elmi üçün böyük aktuallıq kəsb edir.

    “Firuzə” operasının yazılma dövrü və bəstəkarın arxivindəki elmi-tədqiqat materialları, musiqi dramaturgiyası, əsərin janr xüsusiyyətləri və Ü.Hacıbəylinin üslub xüsusiyyətləri, İsmayıl Hacıbəyovun “Firuzə” operasının bərpasındakı rolu məruzənin əsas istiqamətlərini təşkil edirdi.  Əsərin konsertləşdirilmiş variantına da mövzu çərçivəsində toxunulmuşdur.

    Seminar Bakı Musiqi Akademiyasının elmi tədqiqat laboratoriyasının əməkdaşlarının iştirakı ilə keçirilmişdir. Seminarda xalq artisti, professor Ülviyyə Hacıbəyova da iştirak etmişdir.

     Çıxışın sonunda mövzu ətrafında geniş fikir mübadiləsi aparılıb, seminar iştirakçılarının sualları məruzəçi tərəfindən ətraflı cavablandırılıb. Bu qəbildən olan araşdırmaların milli musiqi irsimizin gələcək nəsillərə ötürülməsində və qlobal miqyasda təbliğində rolu yüksək qiymətləndirilib.

     

     

    ZÜMRÜD MƏMMƏDOVA

    Xalq artisti, dosent, BMA-nın böyük elmi işçisi

    İLAHƏ QİSMƏT q. ABDULLAYEVA

    Sənətşünaslıq üzrə fəlsəfə doktoru, elmi işçi, bəstəkar

    Back to Top