• Bütün bunlara görə Üzeyir Hacıbəyovun yaradıcılığı Azərbaycan xalqının milli sərvətidir. 

    Üzeyir Hacıbəyov şəxsiyyəti Azərbaycan xalqının iftixarı, bizim milli iftixarımızdır.

     

    Heydər Əliyev

     

  • Bəstəkarlar öz əsərlərini yaradarkən, unutmamalıdırlar ki, bizim yaradıcılığımızı xalq qiymətləndirir.

    Çunki xalq yalnız yaradıcı, yalnız bəstəkar deyildir; xalq eyni zamanda misilsiz tənqidçi və musiqi

    əsərlərinin ən yaxşı «istehlakçısıdır», xalq musiqi əsərlərinə diqqətlə yanaşır, yaxşını pisdən seçir.

     

    Üzeyir Hacıbəyli

  • Azərbaycan bəstəkarlıq məktəbinin yaradıcısı, məşhur sovet bəstəkarı Üzeyir Hacıbəyovun musiqisi xalqımızın

    ürəyində yaşayır, onun mə'nəvi həyatını zinətləndirir. Zaman bu böyük iste'dadın qurduğu əzəmətli

    binanı sarsıtmaqdan nəinki acizdir, əksinə, onun getdikcə daha da möhkəmləndiyinə şahid olur.

     

    Qara Qarayev

  • Üzeyir məni özünə xas təmkinlə, çox mehriban bir münasibətlə qarşıladı.

    O gündən başlayaraq, ömrünün axırına qədər ölməz sənətkarın hərarətli münasibətini duydum.

    İlk dəfə şəxsiyyətində hiss etdiyim bu hərarəti get-gedə sənətində də duydum və bütün varlığımla ona bağlandım...

     

    Fikrət Əmirov

    15 aprel 2025-ci il

    Aprelin ortasında Almatıda, Kurmanqazı adına Qazaxıstan Milli Konservatoriyasında "Musiqi türkologiyası bu gün: problemlər və perspektivlər" mövzusunda Beynəlxalq elmi-praktik konfrans keçirilib.

    Tədbir çərçivəsində "Türkdilli ölkələrin milli musiqi alətləri" kitabının təqdimatı baş tutub(layihə rəhbərləri: Ü.Hacıbəyli adına BMA-nın rektoru Fərhad Bədəlbəyli və Türk Mədəniyyəti və İrsi Fondunun I prezidenti Günay Əfəndiyeva). Bulat Karakulov adına Türk Musiqi Mədəniyyəti və İrsi Mərkəzinin açılışı da mühüm hadisə olub.

    İştirakçıları görkəmli ictimai xadim, tədqiqatçı Oljas Süleymenov, ünlü etnomusiqişünas İzali Zemtsovski, ICTMD-nin səfiri, professor Düsen Kaseinov, Qazaxıstan Milli Konservatoriyasının rektoru Gauhar Tasbergenova, həmçinin ICTMD prezidenti Tang Sui Beng, ICTMD-nin müxtəlif tədqiqat qruplarının sədrləri Raziya Sultanova, Abdulla Akat, Türk Mədəniyyəti və İrsi Fondunun prezidenti Aktotı Raimkulova salamlayıblar. Konfransın məramı haqqında tanınmış alim, elmlər doktoru Saule Uteqaliyeva məlumat verib.

    Konfransda Türkiyə, Özbəkistan, Qırğızıstan, ABŞ, Yaponiya, Almaniya, Rusiya, Polşa, Sloveniya, Xorvatiyadan alimlər iştirak ediblər. Ü.Hacıbəyli adına BMA-nın professoru Zümrüd Dadaşzadə forumun işində fəal iştirak edib. Plenar iclasda Z.Dadaşzadə "Hacıbəylidən müasir dönəmə doğru: Azərbaycan musiqisində ənənəvi alətlərin rolunun transformasiyası" mövzusunda məruzə ilə çıxış edib. O,habelə Avrasiyanın türk xalqlarının musiqi alətləri və instrumental musiqisi, türk xalqlarının ənənəvi musiqi janrlarının oxşarlığı və fərqi ilə bağlı  problemlərin müzakirə olunduğu şöbəyə moderatorluq edib.

    Z.Dadaşzadə "Üzeyir Hacıbəylinin şəxsiyyəti və yaradıcılığı: XXI əsrdən baxış" mövzusuna həsr olunmuş ustad dərsi də keçirib. Musiqişünas Üzeyir bəyin fəaliyyətinin çoxcəhətli mahiyyətini təqdim edib, bəstəkarın ideyaları prizmasından müasir Azərbaycan musiqisinin panoramını sərgiləyib.

    Türk dünyası musiqisinin parlaq palitrasını təqdim edən konsertdə Beynəlxalq Muğam Mərkəzinin triosu – Ayşən Mehdiyeva (xanəndə), Rüstəm Müslümov (tar), Ceyhun Muradov (kamança) çıxış edərək xalq mahnıları və "Qarabağ şikəstəsi"ni səsləndiriblər.

      

    Back to Top