• Bütün bunlara görə Üzeyir Hacıbəyovun yaradıcılığı Azərbaycan xalqının milli sərvətidir. 

    Üzeyir Hacıbəyov şəxsiyyəti Azərbaycan xalqının iftixarı, bizim milli iftixarımızdır.

     

    Heydər Əliyev

     

  • Bəstəkarlar öz əsərlərini yaradarkən, unutmamalıdırlar ki, bizim yaradıcılığımızı xalq qiymətləndirir.

    Çunki xalq yalnız yaradıcı, yalnız bəstəkar deyildir; xalq eyni zamanda misilsiz tənqidçi və musiqi

    əsərlərinin ən yaxşı «istehlakçısıdır», xalq musiqi əsərlərinə diqqətlə yanaşır, yaxşını pisdən seçir.

     

    Üzeyir Hacıbəyli

  • Azərbaycan bəstəkarlıq məktəbinin yaradıcısı, məşhur sovet bəstəkarı Üzeyir Hacıbəyovun musiqisi xalqımızın

    ürəyində yaşayır, onun mə'nəvi həyatını zinətləndirir. Zaman bu böyük iste'dadın qurduğu əzəmətli

    binanı sarsıtmaqdan nəinki acizdir, əksinə, onun getdikcə daha da möhkəmləndiyinə şahid olur.

     

    Qara Qarayev

  • Üzeyir məni özünə xas təmkinlə, çox mehriban bir münasibətlə qarşıladı.

    O gündən başlayaraq, ömrünün axırına qədər ölməz sənətkarın hərarətli münasibətini duydum.

    İlk dəfə şəxsiyyətində hiss etdiyim bu hərarəti get-gedə sənətində də duydum və bütün varlığımla ona bağlandım...

     

    Fikrət Əmirov

    30 may 2024-cü il

    Ü.Hacıbəyli adına Bakı Musiqi Akademiyasının “Şifahi ənənəli Azərbaycan professional musiqisi və onun yeni istiqamətlərinin tədqiqi: Orqanologiya və Akustika” elmi - tədqiqat laboratoriyasının aparıcı elmi işçisi,  Azərbaycan Bəstəkarlar İttifaqının İdarə

    heyətinin üzvü, bəstəkar Rüfət Ramazanovun  “Azərbaycan muğamlarının nota yazılması və müxtəlif alətlər üçün işlənilməsi” mövzusunda elmi seminarı keçirildi.

    Seminarda R.Ramazanov Azərbaycan muğamlarının nota yazılması ilə bağlı tarixi faktlara diqqət yetirərək, çoxəsirlik muğam sənətinin dərindən, hərtərəfli, elmi surətdə öyrənilməsi və tədqiqi üçün onların müasir not sistemi ilə yazılmasının böyük əhəmiyyəti olduğunu bildirdi. Bu günə kimi müxtəlif bəstəkarlar və tədqiqatçı- alimlər tərəfindən qələmə alınmış  bütün not yazılarının mühüm elmi-etnoqrafik və tədris-metodiki   dəyəri olduğunu qeyd edən  R.Ramazanov, elmi-tədqiqat laboratoriyasında çalışdığı uzun illər ərzində   “Rast”,” Şur” , “Çahargah”, “Şüştər”, “Rahab”, “Bayatı-Şiraz”, “Humayun”, “Segah”, “Mirzə-Hüseyn Segahı” kimi muğamlarımızı, müxtəlif tanınmış tar, kamança ustadlarının – Bəhram Mansurov, Habil Əliyev, Arif Əsədullayev, Hacı Məmmədov, Elman Bədəlov, Sərvər İbrahimov - ifası əsasında notlaşdırması haqqında ətraflı məlumat verdi. Bəstəkar bu notlaşdırmalarda muğamların bütün incə çalarlarını və   xüsusiyyətlərini  saxlamaq üçün istifadə etdiyi müasir yazı texnikasını nümayiş etdirdi.

    Daha sonra məruzəçi notlaşdırılmış muğamlar əsasında solo violin üçün qələmə aldığı “Rahab” instrumental pyesini və arfa aləti üçün “Şur” əsərini təqdim etdi. Əsərlərin hər birinin qələmə alınmasında alətlərin texniki imkanlarının və ifa xüsusiyyətlərinin vacibliyinin əsas olduğunu bildirən R.Ramazanov “Rahab”ın Rusiyanın Moskva şəhərində  A.S.Puşkin adına sərgi və konsert salonunda  Marina Kuriqanova tərəfindən ifa olunduğunu diqqətə çatdırdı və hər iki əsərin audio yazısını təqdim etdi.

    Seminarın sonunda mövzu ilə bağlı maraqlı diskussiyalar aparıldı və  elmi-tədqiqat laboratoriyasının müdiri, sənətşünaslıq üzrə fəlsəfə doktoru, dosent Nuridə İsmayılzadə mövzunun aktuallığını vurğulayaraq məruzəçini təbrik etdi.

     

    Mehparə Rzayeva

    dosent, sənətşünaslıq üzrə fəlsəfə doktoru,

    aparıcı elmi işçi.

    Back to Top