4 may 2023-cü il tarixində Cəfər Cabbarlı adına   Azərbaycan Dövlət Teatr Muzeyində Ümummilli lider Heydər Əliyevin anadan olmasının 100 illiyi münasibətilə tədbir keçirildi. 

Öncə Azərbaycan Respublikasının Dövlət Himni səsləndirildi. Sonra Vətən uğrunda canından keçən şəhidlərimizin xatirəsi bir dəqiqəlik sükutla yad olundu.

Tədbiri giriş sözü ilə açan teatr muzeyinin mətbuat katibi Aytən Məmmədova Ulu öndərin şərəfli ömür yolundan bəhs etmiş, dahi şəxsiyyətin Azərbaycanın tarixinə, mədəniyyətinə, elm və təhsilinə, eləcə də digər sahələrə verdiyi yüksək qiyməti vurğulamışdır. Eyni zamanda Ulu Öndərin mənalı ömür yolu və fəaliyyətinin müəyyən məqamlarını əks etdirən video-çarx nümayiş olunmuşdur.

Sonra söz musiqiyə verildi. Bədii hissədə Üzeyir Hacıbəyli adına Bakı Musiqi Akademiyasının istedadlı tələbələri-Camalə Abdinzadə, Talıb İsgəndərli, Nurcan Rzayeva, Leyla Hüseynzadə, Rəvan Mustafazadə, İlahə Məmmədova və Nigar Hüseynzadənin uğurlu çıxışı dinləyicilərdə xoş ovqat yaratdı. Konsert proqramında Fikrət Əmirovun “Küçələrə su səpmişəm”, iki prelüd, Qara Qarayevin iki prelüd,  iki romans, Sevil Əliyevanın “Ana” əsərləri səsləndirildi.

Tədbir tamaşaçılar tərəfindən böyük maraqla qarşılandı.