• Bütün bunlara görə Üzeyir Hacıbəyovun yaradıcılığı Azərbaycan xalqının milli sərvətidir. 

    Üzeyir Hacıbəyov şəxsiyyəti Azərbaycan xalqının iftixarı, bizim milli iftixarımızdır.

     

    Heydər Əliyev

     

  • Bəstəkarlar öz əsərlərini yaradarkən, unutmamalıdırlar ki, bizim yaradıcılığımızı xalq qiymətləndirir.

    Çunki xalq yalnız yaradıcı, yalnız bəstəkar deyildir; xalq eyni zamanda misilsiz tənqidçi və musiqi

    əsərlərinin ən yaxşı «istehlakçısıdır», xalq musiqi əsərlərinə diqqətlə yanaşır, yaxşını pisdən seçir.

     

    Üzeyir Hacıbəyli

  • Azərbaycan bəstəkarlıq məktəbinin yaradıcısı, məşhur sovet bəstəkarı Üzeyir Hacıbəyovun musiqisi xalqımızın

    ürəyində yaşayır, onun mə'nəvi həyatını zinətləndirir. Zaman bu böyük iste'dadın qurduğu əzəmətli

    binanı sarsıtmaqdan nəinki acizdir, əksinə, onun getdikcə daha da möhkəmləndiyinə şahid olur.

     

    Qara Qarayev

  • Üzeyir məni özünə xas təmkinlə, çox mehriban bir münasibətlə qarşıladı.

    O gündən başlayaraq, ömrünün axırına qədər ölməz sənətkarın hərarətli münasibətini duydum.

    İlk dəfə şəxsiyyətində hiss etdiyim bu hərarəti get-gedə sənətində də duydum və bütün varlığımla ona bağlandım...

     

    Fikrət Əmirov

    22 sentyabr 2022-ci il

    Dahi bəstəkarımız Ü.Hacıbəylinin 137-ci ildönümünə həsr olunmuş Dəyirmi masa təşkil edildi.

    Ü.Hacıbəyli adına Bakı Musiqi Akademiyasının Q.Qarayev adına zalında 2022-ci il 22 sentyabr tarixində “Şifahi ənənəli Azərbaycan professional musiqisi və onun yeni istiqamətlərinin tədqiqi :Orqanologiya və Akustika” elmi-tədqiqat laboratoriyasının təşkilatçılığı ilə “Üzeyir Hacıbəylinin ölməz irsi” mövzusunda Dəyirmi masa keçirilmişdir.

    Tədbir Vətən müharibəsində şəhid olan əsgərlərimizin xatirəsini yad etməklə bir dəqiqəlik sükutla açıq elan olundu. Ardından Azərbaycanın dövlət himni səsləndirildi.

    BMA-nın elm və yaradıcılıq işləri üzrə prorektoru,  Əməkdar incəsənət xadimi, fəlsəfə elmləri doktoru, professor  G.Abdullazadə iştirakçıları salamlayaraq özünün fəaliyyəti dövründə Ü.Hacıbəyli irsinin qorunması istiqamətində gördüyü işlər haqqında maraqlı faktları iştirakçıların nəzərinə çatdırdı. 2005-ci ildə yaradılmış komissiyanın tərkibində olarkən Ü.Hacıbəyliyə məxsus küliyyatına aid olan əlyazmalarının böyük çətinliklə toplanaraq dahi bəstəkarın ev muzeyinə təhvil verilməsi və əldə olunmuş arxiv materiallarının siyahısı ilə iştirakçıları tanış etdi. G.Abdullazadənin çıxışından sonra Ü.Hacıbəyliyə həsr olunmuş videoçarx nümayiş olundu. Dahi bəstəkarın həyat və yaradıcılıq yolunu xronoloji şəkildə təsvir edən videoçarx “Koroğlu” operasının Üvertürası sədaları altında təqdim edildi.

    Çıxış edən elmi-tədqiqat laboratoriyasının müdiri, sənətşünaslıq üzrə fəlsəfə doktoru , dosent N.İsmayılzadə görkəmli bəstəkarın yaradıcılığı boyu qarşılaşdığı çətinliklərdən bəhs edərək maraqlı faktları açıqladı.Ölkənin ağır zamanlardan keçdiyi dövrdə də bəstəkara olunan təzyiqlərə baxmayaraq, yaradıcı mühitin formalaşması və inkişafında göstərdiyi xidmətlərindən bəhs etdi.

    Daha sonra elmi-tədqiqat laboratoriyasının baş elmi işçisi, Xalq artisti, professor  tarzən  Ramiz Quliyev Ü.Hacıbəylinin xidmətləri haqqında,onun yüksək nüfuzu, xalqımızın mədəni irsinə bəxş etdiyi çoxsaylı inciləri haqqında söz açdı. Elmi laboratoriyanın digər baş elmi işçisi, Əməkdar incəsənət xadimi,sənətşünaslıq üzrə fəlsəfə doktoru,  professor A.Əsədullayev çıxışında “Ü.Hacıbəyli və muğam” mövzusuna toxunaraq muğamlarımızın nota yazılmasının vacibliyini diqqətə çatdırdı.

    Daha sonra elmi laboratoriyanın baş elmi işçisi sənətşünaslıq üzrə fəlsəfə doktoru, dosent M.Qafarova öz müəllimlərinin bəstəkar haqqında olan xatirələrindən danışdı. Xüsusilə, görkəmli bəstəkarlarımızdan olan S.Ələsgərov və H.Xanməmmədovla Üzeyir bəyin müəllim-tələbə münasibətləri haqqında söz açdı.

    Tədqiqatçı-alim R.Bəhmənli bəstəkarın özünün əsərlərində milli musiqinin tətbiqi və xalq rəqsləri işləmələrinin yaranmasında  Ü.Hacıbəylinin rolu haqqında fikirlərini iştirakçıların diqqətinə çatdırdı.

    Dəyirmi masa iştirakçılarının hər biri  Üzeyir bəyə Allahdan rəhmət diləyərək, yüksək səviyyədə və səmimi abu-havada təşkil olunmuş tədbirə görə elmi-tədqiqat laboratoriyasının rəhbərliyinə minnətdarlıqlarını bildirdilər.

                                                                                                      Elmi tədqiqat laboratoriyasının elmi işçisi  

    İlahə Qismət

    Back to Top