• Bütün bunlara görə Üzeyir Hacıbəyovun yaradıcılığı Azərbaycan xalqının milli sərvətidir. 

    Üzeyir Hacıbəyov şəxsiyyəti Azərbaycan xalqının iftixarı, bizim milli iftixarımızdır.

     

    Heydər Əliyev

     

  • Bəstəkarlar öz əsərlərini yaradarkən, unutmamalıdırlar ki, bizim yaradıcılığımızı xalq qiymətləndirir.

    Çunki xalq yalnız yaradıcı, yalnız bəstəkar deyildir; xalq eyni zamanda misilsiz tənqidçi və musiqi

    əsərlərinin ən yaxşı «istehlakçısıdır», xalq musiqi əsərlərinə diqqətlə yanaşır, yaxşını pisdən seçir.

     

    Üzeyir Hacıbəyli

  • Azərbaycan bəstəkarlıq məktəbinin yaradıcısı, məşhur sovet bəstəkarı Üzeyir Hacıbəyovun musiqisi xalqımızın

    ürəyində yaşayır, onun mə'nəvi həyatını zinətləndirir. Zaman bu böyük iste'dadın qurduğu əzəmətli

    binanı sarsıtmaqdan nəinki acizdir, əksinə, onun getdikcə daha da möhkəmləndiyinə şahid olur.

     

    Qara Qarayev

  • Üzeyir məni özünə xas təmkinlə, çox mehriban bir münasibətlə qarşıladı.

    O gündən başlayaraq, ömrünün axırına qədər ölməz sənətkarın hərarətli münasibətini duydum.

    İlk dəfə şəxsiyyətində hiss etdiyim bu hərarəti get-gedə sənətində də duydum və bütün varlığımla ona bağlandım...

     

    Fikrət Əmirov

    17 yanvar 2020-ci il

    2020-ci il 17 yanvar tarixində Üzeyir Hacıbəyli adına Bakı Musiqi Akademiyasının Böyük zalında “20 yanvar” hadisələrinin 30-cu il dönümü ilə əlaqədar anım tədbiri keçirildi.


    Tədbirdə Azərbaycan Respublikasının Təhsil Naziri Ceyhun Bayramov çıxış edərək, “Qanlı yanvar” hadilərindən söz açdı və şəhidlərimizin xatirəsini hörmətlə andı.
    Sonra dirijor, Əməkdar artist Fuad İbrahimovun rəhbərliyi ilə Ü.Hacıbəyli adına Bakı Musiqi Akademiyasının “Baku Chamber orchestra” - Gənclər Kamera Orkestrinin ifasında Qara Qarayevin “Matəm odası” əsəri səslənir.
    Ardınca Azərbaycan Yazıçılar Birliyinin sədri, Xalq yazıçısı Anara söz verilir. Yazıçı 20 yanvar hadisələri zamanı günahsız, əli yalın insanlara göstərilən şiddətə qarşı xalqımızın necə şücaət, əzmkarlıq, qəhrəmanlıq göstərdiyini vurğuladı.
    Daha sonra orqanda Nigar Məmmədova Aqşin Əlizadənin “Muğam sədaları” əsərini, solist Nicat Məsimov isə balabanda F.Əmirovun “Mən səni araram” əsərini ifa etdi. “Baku Chamber orchestra” da B.Brittenin “Sentimental sarabanda” əsərini səsləndirdi.
    Tədbirdə BMA-nın Xarici tələbələrlə iş üzrə şöbə müdiri, Sənətşünaslıq üzrə fəlsəfə doktoru Vüqar Hümbətov və “Musiqi tarixi” kafedrasının baş müəllimi, sənətşünaslıq üzrə fəlsəfə doktoru Minaxanım Babayeva görkəmli bəstəkar Arif Məlikovun 20 yanvar hadisələrinə həsr olunmuş kitabından nümunələrlə çıxış etdilər.
    Sonda tədbir orkestrin müşayiətilə Arslan Növrəslinin ifasında Vasif Adıgözəlovun “Qərənfil” əsəri ilə tamamalandı.