Siyəzəndə ustad dərsləri uğurla başa çatdı

26–27 may 2025-ci il tarixlərində Azərbaycan Respublikası Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzinin təşkilatçılığı, Quba-Xaçmaz Regional Mədəniyyət İdarəsinin dəstəyi ilə Siyəzən şəhərində yerləşən Ə.Ağayev adına Uşaq İncəsənət Məktəbində fortepiano, violin və tar ixtisasları üzrə ustad dərsləri təşkil olunub.

Görkəmli bəstəkar Üzeyir Hacıbəylinin 140 illik yubileyinə həsr olunmuş bu layihə regionlarda musiqi təhsili səviyyəsinin müasir tələblərə uyğunlaşdırılması, musiqi və incəsənət məktəblərində tədris prosesinin ixtisas proqramlarına uyğun şəkildə tənzimlənməsi, yerlərdə metodiki dəstəyin göstərilməsi və müəllimlərin peşəkar inkişafına dəstək məqsədi daşıyır.

Ustad dərsləri Üzeyir Hacıbəyli adına Bakı Musiqi Akademiyasının təcrübəli pedaqoqları tərəfindən aparılıb:

Fortepiano ixtisası üzrə – "İxtisas fortepiano" kafedrasının müəllimi, dosent, sənətşünaslıq üzrə fəlsəfə doktoru Nərgiz Salmanlı,

Violin ixtisası üzrə – "Simli alətlər" kafedrasının professoru, Əməkdar müəllim, sənətşünaslıq üzrə fəlsəfə doktoru Hökümə Əliyeva,

Tar ixtisası üzrə – Mədəniyyət üzrə Elmi-Metodiki və İxtisasartırma Mərkəzinin sektor müdiri, Əməkdar artist Neymət Mürsəlov.

Dərslər zamanı ixtisas alətləri üzrə ifa texnikası, alətin düzgün tutulması, barmaqların applikaturaya uyğun şəkildə yerləşdirilməsi, qamma və etüd məşğələlərinin əhəmiyyəti, şagirdlərin texniki imkanlarının inkişaf etdirilməsi yolları ətraflı izah edilib. Həmçinin ifa olunan əsərlərin bədii və üslub xüsusiyyətləri, dinləyiciyə düzgün emosional və musiqi mesajının çatdırılması üçün ştrix və nüanslara xüsusi diqqət yetirilməsinin vacibliyi vurğulanıb.

Ustad dərslərində iştirak edən müəllim və şagird kollektivləri belə layihələrin regionlarda mütəmadi keçirilməsinin əhəmiyyətini vurğulayıb, bu təşəbbüslərin musiqi təhsilinin inkişafında mühüm rol oynadığını qeyd ediblər.