3 fevral 2025-ci il
Üzeyir Hacıbəyli adına Bakı Musiqi Akademiyasında Dmitri Sitkovetskinin Ustad dərsi keçirildi.
03 fevral 2025-ci il tarixində Ü.Hacıbəyli adına Bakı Musiqi Akademiyasının (BMA) konfrans zalında dünya şöhrətli violin ifaçısı və dirijor Dmitri Sitkovetski ustad dərsi keçirdi. Musiqi dünyasında virtuoz ifası və dərin interpretasiyaları ilə tanınan Böyük Britaniyadan olan sənətkar gənc musiqiçilərlə görüşərək, onların ifaçılıq bacarıqlarını inkişaf etdirmək məqsədilə dəyərli tövsiyələrini paylaşdı.
Öncə Azərbaycanın Xalq artisti, BMA-nın Beynəlxalq əlaqələr, sosial məsələlər və ictimaiyyətlə əlaqələr üzrə prorektoru, professor Yeganə Axundova qonağı təqdim edərək, onun musiqi sənətindəki əhəmiyyətli rolunu vurğuladı.
Ustad dərsdə Bakı Musiqi Akademiyasının tələbələri və Bülbül adına Orta İxtisas Musiqi Məktəbinin şagirdi iştirak edərək aşağıdakı proqramla çıxış etdilər:
Kənan Məmmədzadə (II kurs) – İ.S.Bax. 1 saylı sonatadan Adajio və Fuqa (g-moll);
Xədicə Qasımova (I kurs) – N. Paqanini Konsert №1 (II, III hissə);
Səbinə Həsənzadə (II kurs) – P.Sarasate “Faust” operasının mövzusuna fantaziya;
Elmira Dadaşova (Bülbül adına Orta İxtisas Musiqi Məktəbinin şagirdi) – H. Venyavski Polonez D-dur.
D.Sitkovetski hər bir ifaçının çıxışını diqqətlə dinləyərək, texniki incəliklər, musiqi ifadəliliyi və interpretasiya məsələləri ilə bağlı qiymətli məsləhətlər verdi. Gənc musiqiçilər ustad sənətkarın tövsiyələrini böyük maraq və həvəslə qəbul edərək, öz peşəkar inkişafları üçün yeni biliklər əldə etdilər.
Bakı Musiqi Akademiyası dünya miqyaslı musiqiçilərin iştirakı ilə keçirilən bu cür ustad dərslərin gənc ifaçıların inkişafında mühüm rol oynadığını əsas götürərək, gələcəkdə də bu ənənəni davam etdirməyi hədəfləyir.
