20 sentyabr 2024-cü il tarixində Üzeyir Hacıbəyli adına Bakı Musiqi Akademiyasında Quartet de Les essences (Almaniya) kvartetinin tələbələrlə ustad dərsi keçirildi. 

Öncə Azərbaycanın Xalq artisti, BMA-nın Beynəlxalq əlaqələr və sosial məsələlər üzrə prorektoru, professor Yeganə Axundova ustad dərsin qonaqlarını və iştirakçılarını salamlayaraq, istedadlı musiqiçiləri tamaşaçılara təqdim etdi.

Onlar da öz növbəsində BMA-nın rəhbərliyi və kollektivinə qonaqpərvərliyə görə təşəkkürünü bildirdi və dəyərli musiqiçilərlə bu  musiqi ocağında görüşməkdən məmnun olduqlarını vurğuladılar. 

Ustad dərsdə S.Raxmaninovun Elegik trio N1 g moll (Trio: professor Kəmalə Neymanova, tələbələr Fatimə Misirli, Orxan Cumayev), K.Sen-Sansın Rondo Capriccioso op. 28 (Özcan Cabbari 3-cü kurs), P.İ.Çaykovskinin “Vals skerzo” (Kənan Məmmədzadə 3-cü kurs) əsərləri üzərində işlənildi. 

Gənc ifaçılar peşəkar musiqiçilərdən faydalı məsləhət və tövsiyələr aldılar.