26 sentyabr 2023-cü il tarixində Heydər Əliyev Fondunun və Mədəniyyət Nazirliyinin təşkilatçılığı ilə Üzeyir Hacıbəyli XV Beynəlxalq Musiqi Festivalı çərçivəsində Üzeyir Hacıbəyli adına Bakı Musiqi Akademiyasının Kiçik zalında "Quatuor Diotima" (Fransa) simli kvartetinin (kvartetin üzvləri: Yun-Peng Zhao/violin, Léo Marillie/ violin, Franck Chevalier/viola, Alexis Descharmes/violonçel) BMA-nın tələbələri ilə ustad dərsi keçiriləcəkdir.

Ustad dərsə başlamadan öncə Azərbaycanın Xalq artisti, BMA-nın Beynəlxalq əlaqələr və sosial məsələlər üzrə prorektoru, professor Yeganə Axundova qonaqları salamlayıb, istedadlı musiqiçiləri dinləyicilərə təqdim etdi.

Onlar da öz növbəsində Bakı Musiqi Akademiyasında olduqlarından məmnunluqlarını bildirdilər.

Professor, müəllim və tələbə heyətinin iştirakı ilə keçirilən ustad dərs zamanı Nərminə İsmayılova, Osman Mustafazadə, Humay Hacızadə, Ərol Rzayev G.Forenin Fortepiano kvartetini ; Üzeyir Mahmudbəyli, Ümid Mustafazadə, Nihad Məmmədov, Əsmər Kərimli isə A.Webernin “6 Bagatelles” əsərlərini ifa etdilər. 

Ustad dərsdə tələbələrə texniki çətin hissələr üzərində necə çalışması üsulları izah olundu və əsəri ifa edərkən hər bir səsin dərinliyini anlayıb sonra dinləyiciyə ötürmək, musiqi parçasını sanki danışıq dilinə tərcümə etməyin zəruri olduğunu qeyd etdilər.

Üzeyir Hacıbəyli adına Bakı Musiqi Akademiyasında keçirilən növbəti ustad dərs tələbələr tərəfindən rəğbətlə qarşılandı.