24 dekabr 2024-cü il
Dekabrın 24-də Üzeyir Hacıbəyli adına Bakı Musiqi Akademiyasının Böyük zalında VII Beynəlxalq "World Harmony" müsabiqəsinin bağlanış mərasimi keçirildi. Bu mərasim, gənc və istedadlı musiqiçilərin bir araya gəldiyi və yüksək sənətkarlıqla çıxış etdikləri möhtəşəm bir tədbir oldu. Müsabiqənin münsiflər heyətinin sədri, SSRİ və Azərbaycan Respublikasının Xalq artisti, Bakı Musiqi Akademiyasının rektoru, professor Fərhad Bədəlbəyli, həmsədri isə Əməkdar müəllim, BMA-nın tədris işləri üzrə prorektoru, professor Nərminə Quliyeva olmuşdur. Beynəlxalq münsiflər heyətinə müsabiqənin təsisçisi Tsinino Biçikaşvili (Gürcüstan), professorlar Rustam Şayxutdinov (Rusiya), Deividas Staponkus (Litva), Ala Bendoraitiene (Vilnus və Kosta-Rika Musiqi Akademiyaları), Bilgutay Öztürk (Türkiyə) və Bakı Musiqi Akademiyasının professor-müəllim heyəti daxil olmuşdur.
Bağlanış mərasimi professor Nərminə Quliyevanın açılış nitqi ilə başlamışdır. O, müsabiqənin 8 nominasiya üzrə keçirildiyini, eləcə də bu il 4 və 5 yaş kateqoriyalarının da əlavə edildiyini qeyd etmişdir. Həmçinin, ənənəvi - fortepiano, simli, vokal, nəfəs və zərb alətləri ilə yanaşı, müsabiqəyə yeni kateqoriyalar daxil edilmişdir: konsertmeyster sinfi, xor-dirijorluq sinfi, ümumi fortepiano və kamera ansamblı. Müsabiqənin xarici münsifləri, Tsinino Biçikaşvili, Ala Bendoraitiene və professor Rustam Şayxutdinov, tədbirin yüksək təşkilatçılıq səviyyəsindən məmnun olduqlarını vurğuladılar. Onlar bu müsabiqənin yalnız iştirakçılar üçün deyil, həm də ümumilikdə musiqi sahəsinin inkişafı üçün mühüm bir addım olduğunu qeyd etdilər. Müsabiqənin həm yerli, həm də beynəlxalq miqyasda gənc musiqiçilərin tanıdılması və onların istedadlarının qiymətləndirilməsində əvəzsiz rol oynadığını bildirdilər.
Tədbir Bakı Musiqi Akademiyasının Böyük və Kiçik Zallarında, B.M.A. nəzdində yerləşən Opera Studiyasında və Qara Qarayev adına 8 saylı Mərkəzi İncəsənət Musiqi Məktəbinin Böyük və Kiçik Zallarında keçirilmişdir. Həmçinin, musiqi məktəbinin Kiçik Zalında dosent Öztürk Bilgutayın ustad dərsi də təşkil olunmuşdur. Professor N. Quliyeva tədbirin bu məkanlarda keçirilməsi ilə bağlı duyduğu qürur hissini ifadə edərək, qaliblərə daha böyük nailiyyətlər arzulamışdır.
Bağlanış mərasimi çərçivəsində qalib ifaçıların çıxış etdiyi qala konserti təşkil olunmuşdur. Bu konsertdə yalnız "Gran-pri" mükafatı qazananlar və birinci yerə layiq görülən vokal ifaçısı çıxış etmişdir. Nəfəs alətləri kateqoriyasında Fərid Hacıyev (Azərbaycan), fortepiano üzrə Bachi Mikeladze (Gürcüstan) və Pavel Kolbasov (Rusiya), simli alətlər üzrə Xədicə Qasımova (Azərbaycan), vokal üzrə Dinara Tausheva (Qazaxıstan) Gran-pri mükafatı qazanmışdır. Birinci yerə layiq görülən vokal ifaçısı Aydan Quliyeva (Azərbaycan) da bu konsertdə çıxış etmişdir.
Qala konsertinin yekununda, Bakı Musiqi Akademiyasının SABAH qruplarının xoru, bədii rəhbər Dmitriy Babayevin rəhbərliyi ilə Cahangir Cahangirovun "Qarabağ" mahnısını ifa edərək tədbirə təntənəli bir son vermişdir. Tədbirin yekununda müsabiqənin iştirakçıları müvafiq olaraq laureat və diplomant adlarına layiq görülərək diplomlarla, digər iştirakçılar isə sertifikatlarla təltif olunmuşdur. Bu müsabiqə, gənc musiqiçilərin bacarıqlarını nümayiş etdirmək və beynəlxalq səviyyədə tanıtmaq baxımından mühüm bir platformaya çevrildi.
