Üzeyir Hacıbəylinin anadan olmasının 140 illiyinə həsr olunmuş bu tədbir, Bakı Musiqi Akademiyasının “Tarix-nəzəriyyə” fakültəsinin SABAH qruplarında təhsil alan II və III kurs musiqişünas tələbələrinin “YARADICI TƏLƏBƏ” layihəsi çərçivəsində hazırladığı təqdimatdır.

Tədbir 1 dekabr 2025-ci il tarixində professor Gülzar Mahmudovanın müəllifliyi və rəhbərliyi, professor Kəmalə Ələsgərlinin isə koordinatorluğu altında keçirilmişdir.

Proqram Azərbaycan Respublikasının Dövlət Himni ilə açılmış, Üzeyir Hacıbəylinin “Koroğlu” operasından “Əhdnamə” əsəri ilə başa çatmışdır. Tədbirdə SABAH qruplarının hər iki kursunun musiqişünas tələbələri fərdi çıxışlar etmiş, həmçinin bəstəkarlıq ixtisası tələbələri Sevgim Musazadə və Xəyal Əsədli böyük bəstəkarın əsərlərini və ona ithaf olunan yeni yaradıcılıq işlərini təqdim etmişlər. Tələbələr Nəzrin Məmmədova, Ayşən Rəfizadə, Nuray Qasımlı və Aytac İsgəndərli öz tədqiqatlarını rəqəmsal video formatında, digərləri isə əyani çıxışlarla dinləyicilərə çatdırmışdır.

Yaradıcı yanaşmalar və elmi dərinliklə seçilən təqdimatlar, akademiyanın professor-müəllim heyəti tərəfindən yüksək qiymətləndirilmişdir. Layihə musiqi elminin gənc nəslinin yaradıcı potensialını nümayiş etdirməklə yanaşı, Azərbaycan musiqisinin banisinin irsinə dərin hörmət və davamlı marağı əks etdirmişdir.