3 fevral tarixində Qara Qarayevin anım gününə həsr olunmuş “Əbədi xatirə” adlı konsert təşkil olunub. Konsert görkəmli bəstəkarın zəngin yaradıcılığına həsr olunmuşdu və gənc ifaçıların təqdimatında keçirildi.

Konsert proqramında Azərbaycan Dövlət Uşaq Filarmoniyasının solistləri, Üzeyir Hacıbəyli adına Bakı Musiqi Akademiyasının “Konsertmeyster ustalığı” kafedrasının müdiri, Əməkdar müəllim, professor Gülnarə Acalovanın, eləcə də Azərbaycan Milli Konservatoriyası nəzdində Musiqi Kollecinin müəllimi Camalə Abdinzadənin siniflərinin tələbələri çıxış etdilər. Səhnədə Nigar Əsgərova, Fidan Musayeva, İqan Ümid Əsgərli, Anisa Karmel Əsgərli, Nəcəf Vəliyev, Cəlalə İsmayılzadə və Asim Rzazadə öz peşəkarlıqları ilə yadda qaldılar.

Konsertdə Qara Qarayevin romansları, fortepiano əsərləri, “Yeddi gözəl” baletindən “Çin gözəli”, “Hind gözəli”, “Adajio” və “Vals”, “İldırımlı yollarla” baletindən “Laylay” və “Qızların gitaralar ilə rəqsi”, həmçinin “İnsan məskən salır” kinofilmindən musiqi səsləndirildi.

Bu yolda bizə dəstək olan Azərbaycan Dövlət Uşaq Filarmoniyasının direktoru Səidə xanım Tağızadəyə və Filarmoniyanın kollektivinə dərin təşəkkürlərimizi bildiririk.