31 may 2025-ci il
Qarabağ Universitetində dahi bəstəkar Üzeyir Hacıbəylinin 140 illik yubileyi çərçivəsində konsert tədbiri keçirildi
30 may 2025-ci il tarixində Xankəndidə yerləşən Qarabağ Dövlət Universitetinin İncəsənət fakültəsinin Böyük zalında Üzeyir Hacıbəyli adına Bakı Musiqi Akademiyasının “Bəstəkarlıq” kafedrası tələbələrinin iştirakı ilə konsert proqramı baş tutdu.
Konsertdə Əməkdar incəsənət xadimi, BMA-nın “Bəstəkarlıq” kafedrasının müdiri, professor Ceyhun Allahverdiyevin, professor Aydın Əzimovun, dosent Arzu Məmmədovanın, dosent Aliyə Məmmədovanın tələbələri çıxış etdilər.
Böyük maraq doğuran tədbirdə çıxış edən tələbələr – Arsalan Navab Moghadam, Ülvi Hüseynzadə, Xəyal Əsədli, Sevgim Musadə, Vahid Rəhimov, Fatimə Məmmədli, Əli Cəfərzadə, Ağabəşir Bayramzadə, Həsən Bədəlzadə, solistlər - Elina Əliyeva, Vəfa Babayeva, Aybəniz Həsən, Əli Hüseynli, Elvin Əliyev, İsmayıl Əsədbəyli, Şöhrət İsmayılov yüksək peşəkarlıq nümayiş etdirdilər. Gənc musiqiçilər həm klassik, həm də müasir musiqi nümunələri ilə tamaşaçılara musiqi bayramı yaşatdılar.
Konsertin keçirilmə məqsədi gənc bəstəkarların əsərlərinin təbliği, eyni zamanda Qarabağ Universitetinin tələbələrinin bəstəkarlıq ixtisası barədə məlumatlandırılması, suallarının cavablandırılmasıdır.
Qarabağ universitetində baş tutan konsert, ustad dərslərlə davam etdirildi. Xankəndiyə edilən işgüzar səfərin ikinci günü - 31 may tarixində Şuşa şəhərində davam etdirildi.
Əməkdar müəllim, Üzeyir Hacıbəyli adına Bakı Musiqi Akademiyasının Tədris işləri üzrə prorektoru, professor Nərminə Quliyeva öncə Xankəndidə sonra Şuşa şəhərində gənc musiqiçilərlə ustad dərslər keçərək, onlarla öz bilik və təcrübəsini bölüşmüş, dəyərli məsləhətlərini verib, gələcək təhsil illərində uğurlar arzu etmişdir.
Bu səfər bölgədə mədəni həyatın canlanmasına və musiqi təhsili sahəsində regionlararası əlaqələrin möhkəmlənməsinə xidmət edir.
Layihə iştirakçılar və təşkilatçılar tərəfindən yüksək dəyərləndirilib və gələcəkdə bu kimi tədbirlərin davam etdirilməsi arzusu ilə başa çatdı.
