Üzeyir Hacıbəyli adına Bakı Musiqi Akademiyasında Musiqi Müəllimliyi Şöbəsinin Tələbələrinin Konserti keçirildi

10 mart 2025-ci il tarixində Üzeyir Hacıbəyli adına Bakı Musiqi Akademiyasında "Metodika və Xüsusi Pedaqoji Hazırlıq" kafedrası ilə "Musiqi müəllimliyi" şöbəsinin tələbələrinin konserti baş tutdu. Tədbirdə gənc musiqiçilər öz ifaları ilə tamaşaçıları valeh edərək, peşəkar ifaçılıq bacarıqlarını nümayiş etdirdilər.

Konsert proqramında müxtəlif janrlara aid əsərlər səsləndi. Tələbələr arasında Nilüfər Ağayeva, Şəfiqə Şirinli, Mələk Mirzəzadə, Leyla Məmmədova, Sevinc Xanəliyeva, Lalə Namazova, Laləzar Hacıyeva, Fatimə Əlizadə, Lamiyə Əliyeva, Züleyxa Babazadə, Səbinə İsmayılova, Sara Ağazadə və digər ifaçılar çıxış etdilər. Proqramda həm instrumental, həm də vokal nömrələr yer aldı.

Xüsusilə, F. Əmirovun "Lirik rəqs", S. Raxmaninovun Prelüd g-moll, T. Quliyevin "Qızlar günəş altında" kinofilmindən "Qızların xoru" və A. Dadaşovun "Qızıl dan" kimi əsərləri tamaşaçılar tərəfindən böyük maraqla qarşılandı. Tədbirdə skripka trio və vokal ansamblları da çıxış edərək, konsertə rəngarənglik qatdılar.

Tələbələrin hazırlığında böyük əməyi olan Bakı Musiqi Akademiyasının professor-müəllim heyəti – dos. N.Əlizadə, dos. A.Rzayeva, dos. M.Tuayeva, dos. H. Yusifova, dos. N. Hüseynova, dos. S. Sultanova və baş müəllim N. Qulamova tələbələrə dəyərli tövsiyələr verərək onların musiqi sahəsində inkişafına dəstək oldular.

Konsert tamaşaçılar tərəfindən böyük rəğbətlə qarşılandı və tələbələrin peşəkar ifaçılıq səviyyəsinin yüksəldiyini bir daha sübut etdi. Bakı Musiqi Akademiyası gənc musiqiçilərin yetişdirilməsi və onların ifaçılıq bacarıqlarının təkmilləşdirilməsi istiqamətində fəaliyyətini davam etdirir.