Öncə dekabrın 25-də Bakı-Qroznı reysini yetirən sərnişin təyyarəsinin qəzaya uğraması nəticəsində həlak olanların xatirəsi bir dəqiqəlik sükutla yad edildi.

Ön söz üçün səhnəyə BMA-nın “Humanitar fənlər” kafedrasının müdiri, filologiya üzrə elmlər doktoru, professor Tərlan Quliyev dəvət olundu.

O, M.Füzulinin qəzəllərindən misal gətirib, görkəmli şairin yaradıcılığının zənginliyindən danışdı.

Sonra Əməkdar incəsənət xadimi, professor Aydın Əzimovun (kafedra müdiri), Əməkdar incəsənət xadimi, professor Ceyhun Allahverdiyevin, dosent Aliyə Məmmədovanın istedadlı tələbələri uğurlu ifaları ilə çıxış etdilər.

Konsert proqramında  dahi şair Məhəmməd Füzulinin sözlərinə musiqi bəstələyən tələbələrin-Ülvi Hüseynzadənin “Gördüm”, Fortepiano üçün mövzu və 13 variasiya, Nuray Əliyevanın Fortepiano üçün 2 pyes, Fatimə Məmmədlinin Violino və fortepiano üçün pyes və rəqs-skerso, “Qəzəl”, Arsalan Navab Moghadamın Fortepiano üçün sonata (II hissə), Xəyal Əsədlinin Fortepiano üçün 3 pyes, Ağabəşir Bayramzadənin Violino və fortepiano üçün 3 pyes, Sevgim Musazadənin “Yenə ol mah mənim aldı qərarım bu gecə”, Vahid Rəhimovun Fortepiano üçün 3 pyes, “İstərəm” əsərləri dinləyicilərə təqdim olundu.

Tədbirdə İsmayıl Əsədbəyli (bariton), respublika və beynəlxalq müsabiqələr laureatı, I kurs tələbəsi Əbdüləli Hüseynli (piano), Respublika və beynəlxalq müsabiqə laureatları III kurs tələbəsi Özcan Cabbari (violino), magistr II kurs tələbəsi Fidan Yunus (piano), Respublika və beynəlxalq müsabiqələr laureatı Cəmil Sədizadə, Respublika və beynəlxalq müsabiqə laureatları magistr I kurs tələbəsi Rəşad Həsənzadə (bariton), magistr II kurs tələbəsi Fidan Yunus (piano), Şöhrət İsmayılov (tenor) əsrarəngiz ifaları ilə çıxış etdilər.

Konsert tədbir tamaşaçılar böyük marağına səbəb olub, gurultulu alqışlarla qarşılandı.