Kurmanqazı adına Qazaxıstan Milli Konservatoriyasının magistr tələbələrinin daha bir qrupunun Üzeyir Hacıbəyli adına Bakı Musiqi Akademiyasında elmi ixtisas artırma dərsləri yekunlaşdı.

30 oktyabr  2024-cü il tarixində Bakı Musiqi Akademiyasında həmin tələbələrin iştirakı ilə maraqlı konsert tədbiri keçirildi. 

Konsertə başlamadan öncə BMA-nın Tədris işləri üzrə prorektoru, professor Nərminə Quliyeva, Xalq artisti, Bakı Musiqi Akademiyasının Beynəlxalq əlaqələr və sosial məsələlər üzrə prorektoru, professor Yeganə Axundova Azərbaycan-Qazaxıstan əlaqələrindən söz açdı, neçə illərdir bu ənənələrin davam etdiyini qeyd edib, ali məktəblər arasındakı  əməkdaşlığı  təqdirəlayiq hal kimi yüksək qiymətləndirdi.

BMA-nın Əlavə təhsil şöbəsinin müdiri, dosent Nərgiz Hüseynova və dosent Dilbər Məmmədova da  tələbələrə ürək sözlərini bildirib, fəaliyyətlərində uğurlar arzu etdi.

İstedadlı tələbələrin çıxış etdiyi  konsert proqramına xarici ölkə və Qazaxıstan bəstəkarlarının mahnıları, eləcə də folklor nümunələri daxil edilmişdir. Qazax milli alətlərində ifa olunan  rəngarəng musiqi nömrələrindən ibarət konsert proqramı tamaşaçıların böyük marağına səbəb olaraq, gurultulu alqışlarla qarşılandı.

Sonra tələbələrə sertifikatlar təqdim olundu.

Konsertdə həmçinin Əməkdar incəsənət xadimi, “İfaçılıq” fakültəsinin dekanı professor Nəzmiyyə Abbaszadə, Əməkdar müəllim, “Fortepiano” fakültəsinin dekanı, professor Nəzakət Rimazi, Əlavə Təhsil şöbəsinin əməkdaşı Firudin Əliyev, BMA-nın digər müəllim heyəti və tələbələr iştirak edirdilər.

Sonda gənc musiqiçilər Xalq artisti, Bakı Musiqi Akademiyasının rektoru, professor Fərhad Bədəlbəyli başda olmaqla, bütün professor müəllim heyətinə böyük diqqət və qayğı üçün dərin təşəkkürlərini bildirdilər.

8

7

2

4

1

6

5

3