31 may 2023-cü il tarixində Üzeyir Hacıbəyli adına Bakı Musiqi Akademiyasının Böyük zalında Respublika və Beynəlxalq müsabiqələr laureatı  Tuba sinfinin tələbəsi Aslan İslamovun solo konserti baş tutdu. Qeyd edək ki, Azərbaycan musiqi mədəniyyətində ilk dəfə Tuba alətində solo konsert keçirildi.

Əməkdar artist, dosent Əli Hacıyevin sinfində təhsil alan Aslan İslamov Azərbaycan və Qərbi Avropa bəstəkarlarının rəngarəng musiqi repertuarına müraciət edərək bütün dinləyiciləri heyran etdi.

Konsert iki hissədən ibarət idi. Birinci hissədə klassik üslubda olan (Oystein Baadsvik – “Ordner Seg”,  Elaine Fine - Tuba üçün sonata, Fikrət Əmirov  - “Mən səni araram”), ikinci hissədə isə cazz üslubunda olan (Harry Warren – “There will never be another you”, Üzeyir Hacıbəyli – “Gülçöhrənin naləsi” (İşlənmə : Şahin Növrəsli), Roy Hargrove –“Strasbourg  Saint-Denis”)  əsərlər yüksək peşəlkarlıq ilə ifa olundu.

Qeyd edək ki, Beynəlxalq müsabiqələr laureatı  Tuba sinfinin tələbəsi Aslan İslamovu Hidayət Sadıqbəyli (Piano),  Kamil Hüseynzadə (Zərb alətləri), Rafət Məmmədov (Saksafon) müşayiət etdilər.

Azərbaycanda ilk dəfə Tuba alətində keçirilən solo konsert zalda əyləşən bütün dinləyicilər tərəfindən böyük rəğbət ilə qarşılandı.  Konsert dinləyicilər tərəfindən gur alqışlarla sona çatdı.