• Bütün bunlara görə Üzeyir Hacıbəyovun yaradıcılığı Azərbaycan xalqının milli sərvətidir. 

    Üzeyir Hacıbəyov şəxsiyyəti Azərbaycan xalqının iftixarı, bizim milli iftixarımızdır.

     

    Heydər Əliyev

     

  • Bəstəkarlar öz əsərlərini yaradarkən, unutmamalıdırlar ki, bizim yaradıcılığımızı xalq qiymətləndirir.

    Çunki xalq yalnız yaradıcı, yalnız bəstəkar deyildir; xalq eyni zamanda misilsiz tənqidçi və musiqi

    əsərlərinin ən yaxşı «istehlakçısıdır», xalq musiqi əsərlərinə diqqətlə yanaşır, yaxşını pisdən seçir.

     

    Üzeyir Hacıbəyli

  • Azərbaycan bəstəkarlıq məktəbinin yaradıcısı, məşhur sovet bəstəkarı Üzeyir Hacıbəyovun musiqisi xalqımızın

    ürəyində yaşayır, onun mə'nəvi həyatını zinətləndirir. Zaman bu böyük iste'dadın qurduğu əzəmətli

    binanı sarsıtmaqdan nəinki acizdir, əksinə, onun getdikcə daha da möhkəmləndiyinə şahid olur.

     

    Qara Qarayev

  • Üzeyir məni özünə xas təmkinlə, çox mehriban bir münasibətlə qarşıladı.

    O gündən başlayaraq, ömrünün axırına qədər ölməz sənətkarın hərarətli münasibətini duydum.

    İlk dəfə şəxsiyyətində hiss etdiyim bu hərarəti get-gedə sənətində də duydum və bütün varlığımla ona bağlandım...

     

    Fikrət Əmirov

    4 noyabr 2022-ci il

    4 noyabr 2022-ci il tarixində Azərbaycanın Estoniyadakı səfirliyi tərəfindən Tallin şəhər Filarmoniyasında 8 Noyabr – Zəfər Gününə həsr olunan konsert təşkil olundu.

    Azərbaycanın Estoniyadakı səfiri Anar Məhərrəmov tədbirdə çıxış edərək Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində Azərbaycan xalqının öz lideri ətrafında sıx birləşdiyini, müzəffər Ordumuzun cəbhədə misilsiz şücaət göstərərək Azərbaycan xalqının tarixində və mədəniyyətində xüsusi yeri olan Şuşa şəhəri də daxil olmaqla, işğalda olan ərazilərimizin erməni tapdağından azad edilməsinin əhəmiyyətindən danışdı.

    Eyni zamanda səfir A.Məhərrəmov Zəfər Gününün Azərbaycan tarixinin şanlı səhifəsini təşkil etdiyini və bu önəmli gündə Azərbaycanın müstəqilliyi, suverenliyi və ərazi bütövlüyü uğrunda canlarından keçən bütün şəhidlərimizin əziz xatirəsinin dərin hörmət və ehtiramla anıldığını xüsusilə vurğuladı.

    Tədbirdə Tallində fəaliyyətlərini davam etdirən azərbaycanlı gənc musiqiçilər - magistr ll kurs tələbələri Məmməd Mahmudzadə (skripka ifaçısı) və Nəriman Əmiraslanov (pianoçu) tərəfindən Zəfər Gününə həsr edilən milli musiqi parçaları-Üzeyir Hacıbəylinin "Cəngi", Fikrət Əmirovun "Muğam poema", "12 miniatür", Qara Qarayevin “Çar kəndinin heykəli”​, beş pyes ("Andante", "Beşik mahnısı", "Çin rəqsi", "Adajio", "Vals), Cövdət Hacıyevin "Ballada", Vaqif Mustafazadənin "Düşüncə" əsərləri  ifa edilmişdir.

     Mərasimin sonunda tədbir iştirakçıları Estoniyada yaşayıb-yaradan görkəmli rəssam R.Quliyevin Qarabağı və xüsusilə Şuşanın heyrətamiz təbiətini özündə əks etdirən rəsm əsərləri ilə tanış oldular.

    Tədbirdə Türkiyə, Qazaxıstan, Braziliya, Şimali Makedoniyanın Estoniyadakı səfirləri, Estoniya-Azərbaycan Parlamentlərarası Qrupun sədr müavini Mihail Korb, Türkiyənin və Moldovanın bu ölkədəki səfirliklərinin əməkdaşları, eləcə də Estoniyadakı Azərbaycan icmasının nümayəndələri, Estoniya ictimaiyyətinin və kütləvi informasiya vasitələrinin təmsilçiləri iştirak etmişlər.

    Back to Top