25 oktyabr 2024-cü il tarixində Üzeyir Hacıbəyli adına Bakı Musiqi Akademiyasında “Tarix-nəzəriyyə” fakültəsinin tələbələri, Tələbə Elmi Cəmiyyətinin sədri Babayeva Minaxanımın rəhbərliyi ilə dahi  Azərbaycan şairi Məhəmməd Füzulinin 530 illik yubileyi ilə bağlı tədbir keçirildi.

Azərbaycan ədəbiyyatının böyük şairi Füzulinin əsərləri və düşüncələri haqqında dərin məlumatları paylaşmaq, onun məhəbbət, insanlıq və mənəviyyat mövzularını əhatə edən əsərlərini təhlil etmək imkanı oldu. Tədbirə qatılanlar Füzulinin poeziyasının dərinliyini və təsirini hiss etdilər, bu da şairin söz qüdrətinin nə qədər güclü olduğunu bir daha sübut etdi. İştirakçılar həm də Füzulinin “Leyli və Məcnun” əsərinin eşqi ilahi səviyyəyə qaldıran fəlsəfi aspektlərini, onun qəzəllərindəki insanlıq dərslərini daha yaxından tanıdılar. Məruzələr, səsləndirilən qəzəllər,  musiqi nömrələri müəyyən məntiqi ardıcıllığa əsaslanırdı. Nəzəri çıxışlarla yanaşı musiqi nömrələri dinləyicilərin marağına səbəb oldu. Burada Üzeyir Hacıbəylinin “Leyli və Məcnun” operasından “Şəbi-Hicran”, C.Cahangirovun “Füzuli” kantatasından xorlar səsləndirildi. Eyni zamanda Ü.Hacıbəylinin “Arşın mal alan” operettasından Əsgərin ariyası, S.Ələsgərovun “Vətənimdir” romans qəzəli dinləyicilərə  təqdim olundu.  Ümumiyyətlə, bu tədbir Azərbaycan klassik ədəbiyyatının dəyərini daha dərindən anlamaq və gələcək nəsillərə çatdırmaq üçün maraqlı bir addım oldu. İştirakçılar Füzuli haqqında daha geniş məlumatlar əldə edərək onun yaradıcılığına olan maraq və diqqəti bir daha təsdiq etdilər.

4

1

2

3