2024-cü ilin oktyabr ayının 18-də  Üzeyir Hacıbəyli adına Bakı Musiqi Akademiyasında SABAH QRUPLARININ 10 İLLİK YUBİLEYİNƏ həsr olunmuş “DÜNƏN. BU GÜN. SABAH” adlı elmi publisistik jurnalın  təqdimatı keçirildi.

Jurnalın elmi redaktoru SSRİ və Azərbaycan Respublikasının Xalq artisti, Dövlət mükafatları laureatı, Üzeyir Hacıbəyli adına BMA-nın rektoru, professor F.Ş.Bədəlbəyli tədbiri  giriş sözü ilə açaraq bütün iştirakçıları salamladı və təqdim olunmuş jurnalın  böyük əhəmiyyət kəsb etdiyini vurğuladı, bütün tələbələri böyük uğur münasibətilə təbrik etdi. Ü.Hacıbəyli adına Bakı Musiqi Akademiyasının “Tarix-nəzəriyyə” fakültəsinin təşəbbüsü ilə ərsəyə gələn elmi-publisistik jurnalda musiqişünaslıq ixtisasında təhsil alan tələbələrin məqalələri yer almışdır. Təqdim olunan jurnalda  BMA-da 10 il ərzində “SABAH” qruplarının tarixi öz əksini tapmışdır. Burada bir sıra konsertlər, festivallar, elmi-praktiki konfranslar, müsabiqələr, “SABAH” ın məzunları, laureatları haqqında maraqlı məqalələr işıqlandırılmışdır. Tədbirdə “SABAH” qruplarında təhsil alan tələbələrin çıxışları  da yadda qalan oldu. Musiqişünaslıq ixtisası üzrə təhsil alan tələbələr - Şəhla Cəlilova, Fəxriyyə Bayramova, Aysel Cəfərova, Günan Heydərova jurnalın ərsəyə gəlməsində iştirak edən BMA-nın bütün professor müəllim heyətinə minnətdarlıqlarını bildirdilər. Qeyd edək ki, nəzəri çıxışlarla yanaşı “SABAH” qruplarında təhsil alan ifaçı tələbələrin də musiqi nömrələri maraqla qarşılandı.  Tədbirdə Beynəlxalq və Respublika müsabiqələr laureatları Hidayət Sadıqbəyli, Namiq Səlimov, Kənan Məmmədzadə, Nuray İsmayılova çıxış edərək, dünya və Azərbaycan bəstəkarlarının maraqlı əsərlərini səsləndirdilər. Sonda musiqişünaslıq ixtisası üzrə “SABAH”qruplarının “Xarıbülbül” xoru çıxış edərək tədbirə yekun vurdu.