12 dekabr 2023-cü il tarixində Üzeyir Hacıbəyli adına Bakı Musiqi Akademiyasının Q.Qarayev adına konfrans zalında görkəmli siyasi xadim Heydər Əliyevin anım günü ilə bağlı tədbir keçirildi.

Tədbirdə Ulu öndərin həyat yolunun müxtəlif mərhələlərinə nəzər yetirildi. Tarixə öz adını əbədi həkk etmiş nadir şəxsiyyətin, qüdrətli siyasi xadimin həyat və fəaliyyəti hər bir Azərbaycan vətəndaşının qürur mənbəyidir. Hər bir xalqın milli azadlıq və istiqlaliyyət tarixində bir xilaskarı vardır! Azərbaycan tarixinin qürur səhifəsidir H. Əliyev! Ümummilli lider müasir dünya tarixində parlaq və silinməz iz qoymuş böyük şəxsiyyət, qeyri-adi zəka, fitri istedad sahibi, müdrik dövlət xadimi olmuşdur. Tədbir iştirakçıları maraqlı və dolğun çıxışlarla yanaşı H.Əliyevin sevdiyi bəstəkar əsərlərini, xalq mahnılarını bədii hissə kimi nümayiş etdirdilər. BMA-nın Tarix-nəzəriyyə fakültəsinin tələbələri: Abulzadə Ləman, Qurbanova Esmira, Hüseynli Aynur, Vəliyeva Aytac, Şərifova Aydan, Mustafayeva Neyjən, Məlikova İradə, Məmmədzadə Fatimə maraqlı mövzularla çıxış etdilər. Tədbirin təşkilatçısı Tələbə Elmi Cəmiyyətinin sədri, sənətşünaslıq üzrə fəlsəfə doktoru Babayeva Minaxanım Ulu öndərin ən sevdiyi mahnılardan birinin C.Cahangirovun “Alagöz” mahnısının olduğunu qeyd etdi və bədii hissədə Svetlana Əhmədova və Hüseyn Quliyev (tar) həmin mahnını səsləndirdilər. Tədbirdə həmçinin Sevil Əliyevanın “Ana” mahnısı, “Küçələrə su səpmişəm” xalq mahnıları video slayd kimi nümayiş olundu. Tədbir iştirakçıları bir daha böyük ehtiram və hörmət hissi ilə görkəmli siyasi xadimi yad etdilər.