9 noyabr 2021-ci il

9 noyabr 2021-ci il tarixində Təhsil Nazirliyinin təşkilatçılığı ilə Baku Crystal Hall konsert zalında  "Zəfər Günü" və "Dövlət Bayrağı Günü"nə həsr olunmuş konsert keçirildi.

Tədbirin keçirilməsində məqsəd 44 günlük Vətən müharibəsi dövründə Azərbaycan xalqının göstərdiyi əzm, iradə və birliyin qorunması məqsədilə gənclərin vətənpərvərlik mövzulu tədbirlər ətrafında toplanılması, vətənə, xalqımıza, dövlət atributlarına olan sevginin gücləndirilməsidir. 

Tədbirə başlamazdan əvvəl ll Qarabağ müharibəsində canından keçən şəhidlərimizin ruhu bir dəqiqəlik sükutla yad edildi. Sonra Dövlət Himni səsləndirildi.

Ardınca Təhsil Nazirliyi tərəfindən 9 noyabr - Dövlət Bayrağı Günü münasibətilə hazırlanmış video çarxın təqdimatı keçirildi.

 Daha sonra tədbir bədii hissədə təşkil edilmiş konsert proqramı ilə davam etdirildi. Konsertdə Üzeyir Hacıbəyli adına  Bakı Musiqi Akademiyası və Azərbaycan Milli Konservatoriyasının tələbə və məzunlarından ibarət istedadlı musiqiçilər iştirak edirdilər.

 Əməkdar artistlər İsgəndər Ələsgərovun(zərb alətləri) və Ruslan Hüseynovun (bas gitara) müşayiətilə Bakı Musiqi Akademiyasının "Musiqi müəllimliyi" fakültəsinin lll kurs tələbəsi Coşqun Qadaşovun ifasında "Laçın" və "Qarabağ" kompozisiyaları  konsertin ən yadda qalan ifası olduğu xüsusi vurğulanmalıdır. Konsertdə vətənpərvərlik mövzularında bəstələnmiş müasir Azərbaycan və dünyaca  məşhur caz musiqi kompozisiyaları səsləndirildi.

"Zəfər günü" və "Dövlət Bayraq günü"nə həsr olunmuş caz konserti dinləyicilərin rəğbətini qazanaraq, gurultulu alqışlarla sona çatdı.

Qeyd edək ki, tədbirdə Bakı şəhərində yerləşən 36 ali təhsil müəssisəsindən dəvət olunan tələbələr və təhsil işçiləri iştirak edirdilər.